TR Zeliang-i Rio & NDPP aitsür

Dimapur, Monupii (May) 20 (TYO): Taoba NPF sorkari Indo-Naga tebilemtsü atema mapa inyak aser taruba Lok Sabha by-election nung Naga yimten tebilemtsü atema inyakba party candidate nem vote agüjang ta Opposition lennir TR Zeliang-i tanü ayongzük.
Naga Peoples’ Front atemabo Naga yimten tebilemtsü latettsüba ya tongtipangtiba lir, ta paisa ashi.
Tuensang Town Hall nung jembidang TR Zeliang-i Chief Minister, Neiphiu Rio aitsü.
Rio-i Naga yimten tebilemtsü tenüng amer nübortem anisa. Lennir mashi kati votes angutsü atema Naga yimten tebilemtsü indang jembitsü saka Naga nungertemi mapa inyakba nung ajemdaker vote agütsütsü, ta pai ashi.
“NDPP-BJP teloktep aser NPF-BJP teloktep tsüngda tebendang tulu lir. NPF-i aniba DAN sorkari December 15, 2017 nü State Assembly nung BJP MLA tem dang Naga yimten latetba sülen ang election agitsü atema mesüzük” ta TR Zeliang-isa metetdaktsü.
“January 28, 2018 nü Hotel Japfu, Kohima nung Kheto Sema aser Tsasepi Sangtam nati Naga nungeri aginüba ama BJP tenüng nung sign asü saka BJP-i tena merenshiba meyipa agiang ta NDPP Party-i kechiba parnok den yariteper BJP pur den mejembiteter” ta paisa asüngdang.
NDPP-i tena atema ola madokba ajanga Rio aser par party-i Naga yimten latettsüba masü saka election ang pusema nungiter ta sayur. Anungji, Naga nungertemi nenok lennirtem metetang aseer parnoki yimjung maparen nung tetsükdaktsü bener arutsütsü merangba ajitetang, ta TR Zeliang-isa ayongzük.
Tuensang nung Lok Sabha by-election atema nüboyimba sentong nung NPF candidate C Apok Jamir-i “Naga yimten tebilemtsü tekaratiba nung latettsü atema mapa inyaktsü” ta nangzük.
Ano külen, NPF otongdar Achumbemo Kikon-ia “NDPP ya regional party ka masü saka BJP Central lennirtem nem temulung lemdaktsütsü atema Khristan state ka nung proxy BJP ka ama mapa inyaker” ta NDPP aitsü.
NPF-i Lok Sabha by-election atema nüboyimba sentongtem maneni Phek aser Kiphire district tem nung Hombarnü agitsü.