TR Zeliang-i tatok meshir

Dimapur, March 1 (TYO): February 25, 2019 nü 13 buba Nagaland Legislative Assembly session tasembuba nung Citizenship Amendment Bill, 2016 atema olemtepdang tetsürtem indang olen ka jembibaji asayamenüa jembiba liasü, ta TR Zeliang-i tanü metetdaktsü.
“Tebur karibo tetsür ana peladaktsütsü akok, saka tebur shingai kibur ana metenzüktettsü” ta jembiba ajanga nisung shinga anema aser talisa tetsürtem anema jembiba masü. Iba olen ya asayamenüa jembiba liasü kechiyong olemtep alidang NLA züngsemtemi asayamenüa jembibaji yimya ka lir. Ajisüaka, ni iba olen jembiba ajanga kar danga temulung yiruja lira ni tatok meshir aser ni jembiba meyipa agir, ta TR Zeliang-isa ashi.