TR Zeliang-i Tir Kovind den ajurutep

CM TR Zeliang den pa meinertemi Tir Kovind den ajuruba angur.

Dimapur, August 30 (TYO): Chief Minister, TR Zeliang aser MLA tem den Lok Sabha MP, Neiphiu Rio nungertemi tanü India Tir Ram Nath Kovind den ajurutepa, pai Presidential election nung takok tulu anguba atema tepela lemsatep.
Iba mapang TR Zeliang-i Naga Yimten tebilemtsü indang onük benoka lemsatepdang, yimjung o terenlok bener arutsü atema Khristmas matongdangsa iba onük angatetteptsüla, ta ashi.
Tesüiba küm 20 tashi Ceasefire tangatettep nung yimten ken o jembia arur aser iba ya mapang langrara agir, anungji tekaratiba nung angatetteptsüla. Naga yimten tebilemtsü ya lemtetba ajanga NE region atema dang masü saka link ajunga atema Southeast Asian linüktem den kishi tasen ka lapoker asütsü ta paisa tir Kovind dang ashi.
Ibaji ajanga Prime Minister, Narendra Modi indang Act East Policy asangsang nung atalokdaktsütsü, ta TR Zeliang-isa shisem.
Chief Minister TR Zeliang aser tangartemisa Home Minister, Rajnath Singh den-a ajurutep aser idangji Nagaland nung tzünglu aser anentsüh ajanga takoksa bener arutsübatem atema teyari agüjang ta Memorandum ka agütsü, ta CMO, Nagaland sangdong ka nung metetdaktsü.