TR Zeliang-i Union Minister Surdarshan dang teyari meshi

Dimapur, October 4 (TYO): Tanü nikongdang Chief Minister, TR Zeliang-i Union Minister of State for Tribal Affairs, Surdarshan Bhagat den ajurutepa senden ka amendang taküm Nagaland nung tzünglu ajanga teraksa bener arutsüba osang metetdaktsü.
State kübok tesem balala nung tzümetsüng agi aputem ponger ao aser ibaji ajanga nübortemi timtem ajurur. Iba atema state sorkari Bailey bridge tem yangluba nung yaritepdaktsünür ta TR Zeliang-i Union Minister dang ashi.
Surdarshan Bhagat-ia iba onük agizüka bilemdangtsü ta nangzük. Pa anogo asemnü atema Nagaland semdangi aru aser pai Brihostibarnü Planning Advisor, CM Chang den külemi Tizit semdangtsü sentong lir.
Tanü, Chief Minister TR Zeliang-isa Project Management Consultants (PMC) asem den senden ka amen.
PMC asemji- SREI Infrastructure Finance Limited, WAPCOS Limited aser Voyants-PWC nungertem lir aser parnoki Kohima Smart City project inyaktsü atema Expression of Interest (EOI) agüja lir. Par asem rongnung ka shimtettsü aser tanü parnoki Power Point Presentation (PPP) ajanga parnok company osang metetdaktsü.
State yimtiba nung drainage system, parking, foot-path, water harvesting, underground cables amalatem nung temulung agütsütsü atema Chief Minister-i PMC pur dang ashi.
Paisa, tekaratiba nung Smart City Project tenzüktsü atema selection process inyaktsü atema ayongzük.
Iba senden nung Municipal Affairs Parliamentary Secretary, Zhaleo Rio den Board of Directors, Kohima Smart City Development Ltd. Khupi Natso, Engineer in Chief PWD; Rajesh Soundararajan, DC Kohima; KD Vizo, Com & Secy FT & Power; Dr. Toshimanen Ozukum, HOD Municipal Affairs aser Kezhochole Rhetso, Asst. Director Urban Development nungertem aden.