TR Zeliang-i vote 36 agi ‘vote of confidence’ takok angu; Taruba hopta Cabinet Minister aser PS tem shimtsü

Kohima, July 21 (TYO): Nagaland nung tawa tasen shimba Chief Minister, T. R. Zeliang-i state assembly nung ‘vote of confidence’ takok nguogo.
TR Zeliang-i vote 58 nungi 47 angu. Iba nung Speaker aser July 29 nü menden ka atema by-election agitsüba vote tem maden.
Mapang tatsüka kanga atsütepa aruba sülen Bodbarnü Angh, P B Acharya-i Dr. Shurhozelie Liezietsu’er sorkar anendaktsüba sülen TR Zeliang Chief Minister shima liasü.
Iba mapang Angh-i TR Zeliang dang July 22, 2017 tashi nung Assembly nung pa indang majority sayuang ta tetuyuba agütsü. Ajisüaka, NLA indang 18 buba emergent session ji tanü ayonga agi aser iba nung TR Zeliang-i confidence motion benokba sülen vote 36-i takok angu.
Tanep Speaker-i assembly nung motion ji vote süteptsü mebenokdang, olemtep mapa ka agi aser idangji Dr. Shurhozelie pusemba MLA 11-ia shilem agi.
MLA Chotisuh Sazo-i onük benoka lemtepdang, 12 buba State Assembly nung mepetmesü teimba ajuruogo ta ashi.
“Iba assembly nung tashi atsütepba ajanga komo aser tarak aika ketogo. Tan assembly nung menden melentepba inyakyim ajakji state adena orr Kaziranga, Assam nungi inyak” ta Sazo-i ashi.
“Tang asenoki ajuruba tensa ya nija tebilembatem toktsür Naga loktiliba ajungtsü atema bilema, NPF party sasep nungdang angatetteper lila, saka tia maka asenok inyakba kümsük nung tajung bilemba, adianu tangatetba aser telongjem indang tangatetbatem maliasü. Iba jagi züngsemtemi tashi raktepba mapa kanga inyaktepogo” ta paisa metetdaktsü.
Dr Shurhozelie Chief Minister menden nungi atsüngdokba aser TR Zeliang shimba inyakyim ya India Linük Temzüng aser State Assembly nung ‘Rule of Procedure and Conduct of Business’ telatetbatem alema inyakogo. Maneni, tanü Vote of Confidence alitsü atema emergent session jatepba ya-a ozüng alema inyakba mapa ka lir, ta Sazo-isa shisem.
Yashi Assembly-i NPF Legislature Party lennir inyaktsü magizüker ta sangoktsüba MLA Kuzholuzo Azo Nienu-ia o jembidang, “TR Zeliang mesüra Dr Shurhozelie pusemba NPF MLA temi session nung adentsü arubaji rarateptsü mesüra tokteptsü atema masü saka mangatetba onüktem jangjateptsü aser state o public-i aginüba ama onük angatetteptsü atema aruba lir” ta ashi.
“Asenok kümsük atemtsü atema ita pezü dang anünga lir, anungji rarateptsü mapang mali” ta paisa shisem.
“MLA tem adenshiba ya züngdangba tokteptsü atema masü kechiyong iba atemabo TR Zeliang pusemer teimba lir ta ajaki meteta dang lir. Ajisüaka, Speaker-i Confidence Motion ji vote asütsü mebenokdang tamasa TR Zeliang Chief Whip asütsü temelaba agütsüba kuli tejangja metetdaktsütsü tim” ta Azo-isa shisem.
“MLA Kiyanielie ket nungi chief whip agienbaji koba temzüng, arrla mesüra appointment inyakyim nung ajemdaker lemtet” ta paisa asüngdang.
“2015 küm TR Zeliang dak mulung mesüi MLA temi pa anema apusodang, onok ket nung MLA 38 rongnungi 22 liasü saka ni Chief Whip shimba magizük. Ajisüaka, tangbo kasa onük atema Speaker indang office-i mapa balaka inyakogo,” ta Azo-isa ashi.
“Onok nem tashiyim agi TR Zeliang nem vote tagütsüdaktsü, saka onoki pa indang appointment order kodaser agizüktsü ta onok mulungsentsü nung bilemba ama vote agütsüdakjang” ta Azo-isa Speaker dang ashi.
MLA Vikheho Swu-ia motion anema o jembidang, NPF Legislature Party ji komaser tentet aser TR Zeliang ji koba yimten telok nungi leader of the House aser Chief Whip shim, ta asüngdang.
Iba mapang P Longon, Yitachu, Thongwang, CL John aser R Tohanba nungertemia kasa onüktem jembi aser parnoki tir Dr. Shurhozelie Liezietsu lenisüba kübok original NPF party-i agütsüba whip ama vote agütsütsü ta metetdaktsü.
Chief Minister TR Zeliang-i pa lenisüba magizükba MLA tem dang langzüdang, “assembly nung MLA 47-i ni pusema nungiter aser Dr Shurhozelie pusemertem 11 dang kümogo” ta ashi.
“12 buba State Assembly ya mepetmesü teimba ajuruba assembly ka lir ta asübaji shitak, ajisüaka onoki President’s Rule marudaktsü aser tesüiba mapang ajuruba ama Party tenüng melentsü atema mapa kecha meinyak” ta paisa ashi.
“Ni NPF party nungi züngdokaka, assembly nungbo iba kümsük matem tashi NPF MLA ka asütsü. Assembly nung ni pusemer teimba lir aser party nungi züngdokaka, MLA mashi kati leader of the House akümtsü akok” ta TR Zeliang-isa shisem.
June ita signature campaign agidang NPF MLA 47 nungi 45-i pa pusema nungit aser NPF Legislature Party lennir ta agizük, ta paisa metetdaktsü.
“Teinyakdak Chief Minister-i menden metoktsütsü atema tashi amshitsü mesüra MLA tem pudena ayutsü akok ta tsübua bilemba agi MLA tem Kaziranga-i ao” ta TR Zeliang-isa ashi.
Dr Shurhozelie assembly nung tashi mali kümadok aser floor test agitsüba liasü, saka pai MLA kar station nung mali ta tenüng amer shilem magi. Telok tilaba kati sorkar ketdangsüa moutettsü aser NPF Party constitution nung party-i Chief Whip shimba indang kecha shia mali, ta paisa metetdaktsü.
MLA 11-i Angh aser Speaker nati shimba Chief Whip aser NPF Legislature Party Leader magizükra, nenoki okadak iba ken o benoktsü akok saka assembly nungbo iba dak sendakba onük benoka olemtep malitsü, ta paisa metetdaktsü.
Iba sülen Speaker-i vote agütsütepba mapang agi aser idangji TR Zeliang pusema vote agütsür MLA 47 lir anungji pai confidence motion kokogo, ta metetdaktsü.
TR Zeliang-i NPF MLA 36, BJP MLA 4 aser Independent MLA 7 indang vote angu aser NPF MLA 10 den Independent MLA kati pa anema vote agütsü.
Assembly tembangba sülen TR Zeliang-i osangbener den sensaksemdang, Council of Cabinet Ministers aser Parliamentary Secretary temji taruba hopta jiang shimtsü ta metetdaktsü.