TR Zeliang indang osang jangjashitsür

Dimapur, Metsüremi (March) 21 (TYO): National Investigation Agency (NIA)-i Leader of Opposition aser taoba Chief Minister, TR Zeliang dang asüngdangyatsü jaokba dak sendakba nung osang tiyazü aika prokshiba atema Leader of Opposition indang office-i osang kar jangjashitsüogo.
Metsüremi (March) 12 ayaterm 12:15 meta NIA-i TR Zeliang dangi mezüng Chief Minister’s Office nung aliba fax ajanga osang yok aser kasa fax ajanga anepdang 10:05 meta kasa osang tanaben yok, ta Information & Publicity Wing, Office of the Leader of Opposition-i metetdaktsü.
Metsüremi (March) 12 nü TR Zeliang-i NIA dang pa Assembly Session nung Leader of Opposition ama shilem agitsü lir aser iba jagi pa marutettsü ta shidi ka yok. Kasa anogo nung NIA-i pa indang personal email aser Whatsapp ajanga Metsüremi (March) 17 nü pa NIA HQ, New Delhi-i arutsü atema osang yok. NIA Investigation Officer dang phone ajanga pai Chief Minister menden toktsüogo ta ashi saka NIA-i Chief Minister’s Office dangi tanaben osangji yoka liasü, ta parnokisa sangdong nung metetdaktsü.
Metsüremi (March) 17 nü pa jaokba atema TR Zeliang-i Metsüremi 16 nü NIA dang pa tongtipang nüngdak kar inyaktsü aliba agi marutettsü aser Assembly Session tembangba sülen ang arunür ta ashi aser kasa osangji NIA Investigating Officer danga phone ajanga pai ashi, ta Leader of Opposition indang office-isa shisem.
Ano, külen osangbener kari taoba Nagaland Chief Minister TR Zeliang-i ozüng alema inyaker nem senotsü teyari agütsü ta osang prokshibaji tiyazü lir. NIA aser sorkar nungi osang tejangja angazük ta shia osangbener kari iba tiyazü osang belenshir saka iba inyakyim ya tim masü aser journalism nung tarak kettsür, ta parnokisa metetdaktsü.
Iba ya nisung kar yimtenren mapa nung tajangzük angutsü atema tasa atonga mapa inyakba ka lir ta temulung melemi bilemer. NIA-i kodanga tiyazü osang meproktsü aser tang osang adoka jembiba ya 2015 küm TR Zeliang anema osang ka prokshiba den mesüktepa lir. Iba mapang pai Singapore aser Hongkong Bank tem nung sen crore 78 miima ayu ta prokshi aser bank temi osang tejangja mashi tashi public temi iba tiyazü osang amang, ta parnokisa ashi.