TRAI-i memunui mobile internet speed asadangba app ka lapoktsü

New Delhi, July 02 (Agencies) : Tanü Honibarnü Telecom Regulatory Authority of India (TRAI)-i, onoki memunui mobile application ka lapoktsü aser ibaji ajanga mobile amshirtemi pei amshiba smartphone nung internet speed asadangtettsü aser iba osang tejangja onok dangi yoktettsü.
“MySpeed App’ ya mobile sewa app store nungi download sütettsü aser iba app amshia internet data speed asadanger TRAI dangi osang yoktettsü, ta Telecom Regulatory Authority sangdong ka ajanga metetdaktsü.
TRAI-i iba app ya July 05, 2016 nü sayatsü, ta sangdong nungsa shia lir.
Sangdong ajanga ashiba agi, iba app ajanga internet data speed osang dang masü saka network osang aser customer koba tesem nungi mobile amshir item ajakji metettsü.
Internet amshirtem nem data speed koba tashi agütsütsü tim ibaji TRAI-i latetja lir. Aji oda süaka customer temi mapang shia internet speed majungba ashir. Aji dang masü saka ano yimti kar nungbo 3G customer nem 2G internet speed ang agütsüba TRAI-i puteta lir.

You must be logged in to post a comment Login