Train anenba tesem asem nung Wi-Fi angadi amshitettsü

New Delhi, May 6 (Agencies) : Railway Minister Suresh Prabhu-i New Delhi nungi videoconference süa Vijayawada, Andhra Pradesh, Raipur, Chhattisgarh aser Kacheguda, Telengana yimtitem nung aliba train anenba tesemtem nung Brihostibarnü angadi Wi-Fi lapoktsüogo.
Iba service ya RailTel ajanga agütsür aser item tesemtem nung angadi WiFi service amshidang internet karadaktsütsü atema RailTel public sector yagi Google den lokteper inyaker.
“RailTel-i power aser fibre network ajak agütsütsü aser Google-i radio access network agütsütsü. Iba service ya ‘Railwire’ inyakyim nung RailTel indang retail broadband distribution model kübok agütsütsü,” ta railway ministry sangdong ka ajanga metetdaktsü.
Train anenba tongtibang tesem ajak nung küm asem tashi nungbosa Wi-Fi inoktsütsü sorkar sentong lir, ta Suresh Prabhu-i ashi.
“Taküm küm tatem tashi nung train anenba tongtibang tesem 100 tashi nungbosa angadi Wi-Fi inoktsütsü. Küm asem nungi onok nükjidong nung aliba ama train anenba tongtibang tesem 400 nung iba service ya agütsütsü. Kodang iba inyakyim renemdir alima nung Wi-Fi service tulutibaji ibai asütsü, ta New Delhi nung Prabhu-i osangbenertem dang ashi.
2016 tatem tashi nung Allahabad, Bhopal, Pune, Ranchi, Ernakulum, Jaipur, Patna aser Guwahati train anenba tesemtem nung angadi Wi-Fi amshitettsü.
Linük nung angadi Wi-Fi mezüng inoktsüba train anenba tesemji Mumbai Central lir.
Yaküm Google India aser India Railways na lungjemer linük nung train anenba tesem 400 tashi nung high-speed Wi-Fi network inokja lir.