Train lendong atema Railway Minister Prabhu-i sodi meshi

New Delhi, August 23 (Agencies): Tawa Uttar Pradesh nung train lendong tulu atalokba atema jashia Bodhbarnü Railway Union Minister, Suresh Prabhu-i pa menden nungi sodi meshi, ajisüaka Ato kilonser, Narendra Modi-i pa dang ata-a liang, ta shiogo.
Twitter ajanga Prabhu-i, “Tia maka lendong ataloka passenger aika yiruogo aser aika süogo, aser iba tatalokba atema ni jashir. Ni kanga mepelar,” ta ashi.
“Ni iba atema khuret agia Ato kilonser @narendramodi dang sodi meshi. Ajisüaka pai kü dang ata-a liang ta ashi,” ta paisa metetdaktsü.
Anogo pongu tsüngda Uttar Pradesh nung train tetsüng longteta adoka anaben tashi lendong ajuruogo.
Uttar Pradesh kübok Auraiya district nung Delhi-i aoba train, Kaifiyat Express coach 10 den engine tetsüng longpeta tsükokba sülen ghonda ishika tsüngda Prabhu-i minister menden nungi alutsü sodi meshi.
Iba lendong nung passenger 74 yirua liasü.
August 19, 2017 aonunga Puri-Haridwar-Kalinga Utkal Express train tetsüng longpeta coach 14 tsükokba lendong nung nisung 23 asü aser nisung 40 shi yirua liasü. Iba lendong ya Uttar Pradesh’, Muzaffarnagar district kübok atalok.
Prabhu-isa, “Minister küm asem inyaka arudang, Railways tajungba akumtsü atema ni kanga meranga inyaka aruogo. Küm 20 dak tema railway sendoka yutsüba asentenshitsü atema ni Ato kilonser lenisüba kübok inyaka aruogo. Ato kilonser indang India tasenba mangdang nung Railways jenjang tajungba akumtsü densema lir,” ta ashi.
Ano külen Union Finance Minister, Arun Jaitley-ia, “Railway minister-i mepishiba atemaji Ato kilonseri telemtetba agitsü,” ta ashi.
Osang ka ajanga ashiba agi, tesüiba küm 10 tsüngda train lendong nung nisung timtiba asübaji 2016-17 küm lir, aser iba mapang nung nisung 193 süogo.