Train mesenzüba ajanga sen crore 74 takoksa alu

Agartala, August 30 (Agencies): Northeast nung tzümetsüng ajanga train senzüsenpong mesademi India nung tesem balala den anogo 16 tashi mesendaktepteti liasü aser iba ajanga sen crore 74 takoksa aluogo.
Northeast Frontier Railway(NFR) nungi osang ka ajanga ashiba agi, tzümetsüng ajanga August 13 nungi 28 tashi nung mail mesera express trains 821 aser passenger train 484 tashi thiogo aser iba ajanga PRS nung sen crore 47.53 aser non-PRS nung sen crore 5.30 takoksa aluogo.
Khu abenba train tem mesenzüba ajanga railway pur booking nung sen crore 16.26 takoksa alu aser parcel booking nung sen crore 3.51 takoksa alu.
“Passenger tem nem sen meyipa agütsüba mesükshi ajak senteper takoksa sen crore 74.04 alu. Tanga department, Engineering, signal aser telecommunication nunger nung takoksa aluba asadangdar,” ta NFR sangdong ajanga metetdaktsü.
Tanen makai mapa inyakba sülen Bihar kübok Sudhani station nungi mezüngbuba khu abenba train Mongolbarnü nungi senzü tenzükogo. Train kanga junga senzü tenzükba sülen north east nung tenüngdakba oset agi anüngba tebilemtsü agintsü. Ajisüaka passenger train bo September 3 nungi ang senzü tenzüktsü.
Northeast nung aliba state tem dak alaka NFR-i West Bengal nung district tenet aser North Bihar nung district pongu ta achaayanger.