Train nung khu talila abenba atema sen agitsü

New Delhi, Aami (June) 5 (Agencies): Tayimtsü nung senzüba ama train nunga khu talila abenba atema sen agitsü.
Train takdangtem nung khu talila abenba onük aika benokba sülen Indian Railways-i küm 30 jakdang yangluba ‘baggage allowance rules’ mapa küma inyaktsü telemtetba agiogo.
Ozüngtemji shitak benshira khu taliba abenba passenger tem dang khu indang taa dang nungi trokben talila senchi achitsü akok ta railway ketdangser kati ashi.
Ozüng lateta aliba nung sleeper class nung amener kati seret 40 aser second class passenger kati seret 35 abentsü aser iba telatet teküpok abenba atemabo sen magitsü. Nisung kati sleeper class nung seret 80 tashi aser second class nung seret 70 tashi khu abentsü akok saka iba atema parcel office nung sen agütsütsü aser khu talilaji luggage van nun gang abentsü.
“Ozüngtemji yanglua lir aser onoki tang ibaji mapa küma inyakerba dang lir. Passenger temi sen agütsür luggage van nung khu talila abentsü akok. Ajisüaka, parnoki telatet dang nungi teimba khu bena lia apu nungbo, khu atema sen agitsü aliba dang nungi trokben talila senchi achitsü” ta Information and Publicity, Railway Board Director, Ved Prakash-i ashi.
Indian Railways-i iba ozüng mapa küma inyaktsü atema Aami (June) 1 nungi 6, 2018 tashi railway zone ajak nung special drive ka agir.