Train nung lendong atalokdaktsüsangji IS züngsem asütsü akok: Bernard

Paris, August 22 (Agencies): Amsterdam yimti nungi Paris yimti bushia aoba nübur aniba train nung prangpong aser kotari ka abener kati yashi, Hokolbar nü lendong atalokdaktsü aser iba nisungbaji Islamic State (IS) den sentaktepba aliba kiralongrar ka asütsü akok ta France Interior Minister, Bernard Cazeneuve-i temulung malenba olen ka tanü Honibar nü metetdaktsüogo.
“Yashi lendong atalokdaktsüsangji IS den sentaktepa aliba Morocco senso asütsü akok ta Spain nung tentetba intelligence ketdangsertemi metetdaktsüogo saka iba osangji tang tashi mejangjateti lir,” ta Bernard-i ashi.
Yashi lendong atalokdaktsüsangi tongpang nung amshitsü Kalashnikov prangpong 1 aser kotari 1 bener Amsterdam nungi Paris bushia aoba Thalys high-speed train telung nung lendong atalokdaktsütsü tenzük saka uniform magi aliba US mitkar züngsem anati iba nisungbaji nokdanga apuba osang jangjaogo.
Kiralongrasangji nokdangtsü merangdang pa nokdanger US mitkar 1 aser anasa mena aliba France nunger actor 1 yirua liasü.
“Yashi yiruba America nungbaji US Air Force ketdangser aser France actor-sangji Jean-Hugues Anglade aliba osang jangjaogo aser tenaprongla tang junga lir,” ta minister-sangi ashi.
Tanabuba America nungbaji Oregon National Guard züngsem aliba osanga jangjaogo ta pai shisem.
Paisa ashiba agi, train-i yashi nikongtsütsü 5:45 ako meta Belgium ajanga aodang lendongji atalokba osang jangjaogo.
Tesülen, train-ji Paris atongtsü ghonda 2 shi anünga lia, Arras station nung anen aser kiralongrasangji police nem amoktsü.
Ajisüaka, yashi amaksangi kechiba lendong atalokdaktsütsü merang iba osangji tang tashi mejangjateti lir.
France Tir, Francois Hollande-ia yashi lendong ataloktsütsüsang nokdangertem dang pelaba olen ka metetdaktsüba den külemi, yashi lendong den sentakba bushisüngdang sentong agitsü tetuyuba ka agütsüogo.