Train ticket thitsüba atema sen anasü tali agütsütsü

New Delhi, November 12 (Agencies): Tanü Brihostibar (November 12, 2015) nungi tenzüka nai train ticket thitsüba atema sen anasü agi tali agütsütsü. Iba asoshi Railways-i ticket counters kar nung reserved ticket refund indang mapa inyaktsü telemtetba agiogo.
Ticket thinentsüba reprangshiba temzüng tasenba nung, train mapusodang ghonda pezü jelia train ticket atema sen meyipa meshitsüla, train apusoa aoba sülenbo ticket atema sen meyipa magütsütsü.
Second class ticket ghonda 48 jelia thitsütsüla, aser ticket thitsüba atema mezüng sen 30 agia aliba nungi sen 60 akümtsü.
Iba den kasa Third AC ticket thitsüba atema mezüng sen 90 agia aliba nungi sen 180 akümtsü.
Waiting list nung aliba ticket aser Reserve Against Cancellation (RAC) atema train mapusodang ghonda tesadang ka (30 minutes) jelia sen meyipa meshitsüla, iba sülenjibo sen meyipa magütsütsü.
Second Sleeper class ticket thitsüba atema sen 60 nungi 120 kümogo aser Second AC thitsüba atema sen 100 nungi 200 kümogo.
Tang tesüsabuba reprangshiba temzüng tasenba nung train mapusoi aliba jakdang ghonda 12 aser ghonda 4 tsüngda ticket thitsübaji ticket sen shilem 50 asütsü.