Transformation Crusade: Yi lar yaritsü indang tesayuba agütsü

Dimapur, March 22 (TYO) : Kohima Local Ground nung ayongzüka agiba Transformation Crusade sentong den külemi repsema Bodbar nikongtsütsü 2.30 meta Sungkum Jamir shiba yi lar ka liasü, pai yi lar kümer alir koda counselling agütsütsü item onük nung teratet shisatsü parnok counsellor 52 nem agüja liasü.
Arogoi iba ama yi lar alirtem ya koda yaritsü item inyakyim ajak nung nungitta yaritsü aser sentepi arurtemji kodang shirangdir arogojia shiranger ta Sungkum Jamir-i ayongzüka liasü.
Tanü sentong nung tongti o jembirji Rev. Zotuo Kiewhuo liasü aser onükji ‘Tanela Temeshi Revival’ liasü.
“Laishiba nung shia aliba ama, shibaisa kü dak amangdir, Ni alima nung sayatenya mapa inyakba dang nungi tali nenoki tuluba inyaktettsü. Anungji nai Yisu meimra, Yisui sayuba aser ashiba chichia agizükang. Kechiaser kübo dang nü den teti yariteper ka agüjang ta ni mepishitsütsü” ta taonung o jembiri tesentepertem ayongzük.
Rev. Zotuo-isa ashiba agi, “shibaisa kü tenüng nung jadir ni langzütsü aser moatsütsü. Anungji kü tenüng nung ajak meshiang aser Ni inyaktsütsü” ta Tsüngremi Laishiba nung nangzüka aliba indang metetdaktsü.
Tenyartem Mapa 1.5 nung Yohanbo tzü nung bapti ta shia lir saka nabo mapang tatsü ka nung tanela temeshi agi tzüsentsütsü, ta paisa lokti ajak ayongzük.
Rev. Zotuo-i Isaia 55 nung ajemdaker jembidang, “shirnok achi ajemtsü maka parnok ajak Yisui agütsüba angati chiyungtsü bushia arung. Kechiba asen nem jangratemtsü magütsüba osettem nung tashi aser rongsen endoktsü? Anungji kü dangi tenarong tenang aser arung süra na taküm alitsü aser Ni Dawid moatsüba ama na moatsüdi” ta ashi.
Revival ya nisung ajak taküm nung kanga dang nüngdaker. Tsüngrem nungi temoatsù mangu tashi aseni Pa dang sarasademba manentsüla.
Yisu kangki nung metatsü sepaitemi apudang Pa nütsüngtemia Yisu toktsü. Mojingi nisung amshia tasa tamajung yanglua Yisu kangki nung meta saka anogo asemnü nung Yisu shia aru. Anungji shirnokisa Yisu nüngdaka lir, Shia aruba Yisu tsüngdangi arua tanela temeshi ajanga asen taküm süngdaktsütsüla. Tanela temeshi ya angati angur ta o jembirisa ayongzük.
Iba crusade ya mojing den raraba sentong balaka lir ta paisa shisem.
Iba sentong tembanger külen aonung shia shirangertem asoshi sarasademtsür aser mamangertem densema nisung aika taneptsü ngur pei kidangi pelaseta aoer. Iba dak alaka nisung nika Yisu nem bendanga agüja tanaben Yisu den longjemshir taküm tasen yanglushir pei kidangi meyipa aoer. Asünga 4:30 ako nungi sentong tajung lir asünung nisung ajak iba sentong nung sarasadema arua temoatsü agitsü o jembiri ashi.
Taonung sentong nung nisung meyirjang asem (3000) shi aden.
Tanü agiba sentong nung Avi Yongo Koinonia Baptist Church Worship Team ajanga Tetushi aser tekulem agi, Neisapi Ltu Director KBNK menden liasü aser Pastor Kugavi Chishi, NCRC Sumi-i temoatsü meshia sarasadem.