Treasuries & Accounts dept. nung ketdangser peria mali

Dimapur, November 6 (TYO): Nagaland Finance & Accounts Service Association indang 15 buba Lokti Mungdang November 6, 2019 nü mongogo.
Iba sentong nung Treasuries & Accounts, NH Advisor Dr. Longrineken-i jembidang “Department of Treasuries & Accounts ya kanga dang tongtipang department ka lir aser sorkar indang tongtiret lir. Anungji ketdangser aser staff ajaki kanga dang nendaka aser bendanga agüja inyaktsü mepishir” ta ashi.
Iba sentong nung Chief Secretary, Temjen Toy, IAS medentet saka pai shidi ka ajanga osang lemsatepa liasü.
“Sorkar ketdangsübaren nung senotsü ya kanga tongtipang shilem lir aser iba ajanga tanga wadangtem takok ngua inyakteter. Nagaland Finance & Accounts Service-i state sorkar kübok department tem ketdangsüba nung tongti shilem agir” ta Temjen Toy-i ashi.
Department balala asoshi Financial Adviser tem ama state senotsü ketdangsür ama iba department nung ketdangsertemi kanga dang junga inyaktsüla. Yamaji mesüra sorkar asoshi senotsü khuret tulu bentsür arutsü, ta paisa metetdaktsü.
Tanü technology kanga ainba ajanga National Pension Scheme, P1MS, computerization of Treasuries, Direct Benefits Transfer ama inyakyim balala tenzüka lir anungji ketdangsertemi item inyakyim angazüktsüla, ta Temjen Toy-isa shisem.
Finance Department Secretary, Kesonyu Yhome, IAS-ia o jembidang “teloktem reprangdanga ora iba telok dak tebilemtsü, tashi aser mapa tuluba keta lir” ta ashi.
Iba telok yagi inyakba dang masü saka state sorkar indang senotsü temzüngtem benshia aser tiptema inyaktsüba mapa tuluba bena lir. NFASA züngsemtemi tangar dang senotsü timi amshitsü tesayuba agütsütsüla, ta Yhome-isa ashi.
State sorkari revenue expenditure aser capital expenditure tsüngda asadangtsüla sen endokbaji kecha masü saka tai nung sen endokra iba jagi state sorkar atema sentsüh tali bendenloktsütsü, ta paisa shisem.
NF&AS tir R. N. Yanthan-i o jembidang “NFASA ya Government Administration den tesentaktep tajung ayutsü atema 1980 küm tentetba liasü” ta metetdaktsü.
NF&AS ketdangsertem ajema kümogo aser tanga nübo 75 agi meperi lir. Iba ajanga Directorate Administration nung timtem ajurur, ta paisa ashi.
State sorkari asoshi Department of Treasuries & Accounts ya tongtipang shilem ka lir. Tongti Department 82 dangi Account officers mapa lemzükja lir aser ano Cheque Drawing Department kübok working Division 104 dangi Divisional Accounts Officers lemzükja lir, ta Yanthan-isa metetdaktsü.