TRGU Vocational Training Centre-i USHA Sewing Machine School training ayonga agi

Dimapur, Match 26 (TYO) : TRGU Vocational Training Centre, Dimapur-i TVTC Dimapur den tesendaktep nung March 20 nungi 26, 2017 tashi advance training course of USHA Sewing Machine School training ayonga agiogo.
TVTC nung tenüng züluoka alir training agitsüpur nem USHA company-i machine 15 tenla agütsü.
Usha Silia School Regional office, Guwahati nung Mechanical Instructor, Wb. Narayan Pathak-i iba training dak keta alibatem rasaa ashi aser ajaki amshiba sü arrba oset amshia Skill development tsütsü inyakyimtem kar sayu.
TVTC kibur Tainla Jamir-i, training agirtem ajangzüktsüsa nenok ama tongtibang nisungtem arua iba amai angateta rasaa ashiba atema kanga pelar aser iba jagi onok kanga ajungmesor, ta ashi.
Tsüngrem taochi agi aser tetsürtem den lanurtem jenjang tajungba küma yanglutsütsü tangatetba tajung nung tanü yangi arua aliba temeimertemi mokoroi tenla agüja aser nungitba ajanga TRGU Vocational Training Centre ya küm 9 buba kecha tetsükdaktsü melii arudar, ta lai shisem.
Tang training agirtem dak nungi ajangshiba dak ajemdaker TVTC nung Co-ordinator /Cum Instructor Akhrienuo Kire-i mapa asoshi lenmang balala tuyuba den tayongzükba agütsü.
Pai, iba training agiba sülen parnoki akokba inyaka pei peria litetba dang masü saka tetsür aser lanurtemi pei sempet tali tashi ita aser tajungba amshiba nung yaritsü, ta shisem.