Tri-series final:Sri Lanka-i wicket 6 agi Zimbabwe madak takok angu

Bulawayo (Zimbabwe), November 27 (Agencies) : Deobarnü Queens Sports Club, Bulawayo nung tri-nations One Day International (ODI) final asaya nung Sri Lanka-i wicket 6 agi Zimbabwe madak takok nguogo.
Zimbabwe mezüng batting asü aser parnoki runs 160 yanglu. Anungji ibaji meneptsü arishidang Sri Lanka nungi opener, Dhananjaya de Silva run ka tang yanglur lia Brian Vitori-i mezüng over nung out sütsüba ajanga khen shisa bulutepa liasü.
Kusal Perera aser Niroshan Dickwella natia runs 14 aser 16 ang yangluteter aliba mapang Vitori-sa out sütsü, anungji Sri Lanka nunger batsman asem out asüdang runs 42 ang yangluteter liasü.
Iba sülen Kusal Mendis-i runs 57 aser Upul Tharanga-i 57 (not out) yanglu. Tena senteper runs 75 tashi yangluteta liasü. Over 28buba nung Graeme Cremer-i Mendis out sütsü.
Mendis adokba sülen Asela Gunaratne ai aser Tharanga tena senteper runs 49 yanglua takok angu.
Zimbabwe atema Vitori-i wicket asem aser Cremer-i ka ta agi.
Zimbabwe batting asüba mapang parnoki over 37 nung run 160 ang yanglur lia ajak out asü. Parnok telok nungi Tarisai Musakanda-i runs 36 aser Sean Williams-i runs 35 yanglubaji runs timbatem liasü
Sri Lanka nungi Nuwan Kulasekara, Dasun Shanaka ase Jeffrey Vandersay nungeri wicket asemsem agi.