Tribal temeten kümzüka ayutsü: Sonowal

Guwahati, September 11 (Agencies): Tanü Assam Chief minister, Sarbananda Sonowal-i, state nung kechi südir süaka tribal temetentem kümzüka ayutsü aser tribal nisungtem sensak tia aser shisaliok nung ajungkettsütsü, ta ashi.
Deobarnü yangi Akhil Bharatiya Vanavasi Kalyan Ashram (ABVKA) Vision Document sayaba sentong nung jembidang Sonowal-i, “Tribal litsü atsünga agibaji sorkari agientsütsü aser lisopur indang ali temetenji kümzüka ayutsü,” ta metetdaktsü.
Pai ashiba agi, tribal nüburtem loktiliba aser rongsenkettsüng jenjang majungba aser shisaliok maliba den külemi sensak tia nung aliba ajanga terenlok maparen nung tetsükdaktsü adokogo, koba ajanga pei litsü nung parnok nütsüng ishiba kümogo.
Iba dak sentakba nung pai, sorkari tribal nisungtem state nung tanga lokti den liromedema ajungkettsütsü asoshi inyaktsü,” ta ashi.
Tribal nisungtem taküm jenjang nungi maongka agia kiralongrartemi lanurtem mesüzüka anir aoer, ibaji memelatsü, ta paisa ashi.
“Centre aser state sorkar napronglai lokti telemsa ajak temeten kümzüka ayutsü atema inyaker, aser sorkar scheme balala agi nübur ajak atongtsü atema inyaktsü,” ta Chief Minister-i nangzük.
Assam nüburtemi taküm nung pei nükjidong ataloktsü atema meranga inyaktsüla, ta shia Chief Minister-i, “Pei tajangzük angutsü atema nüburtemi meranga inyak nungdang sorkar schemes takok angutsü,” ta ashi.