Tribunal-i Assam Paper Mill 2 shibangtsü tuyu

Guwahati, June 25 (Agencies): National Company Law Tribunal (NCLT)-i Assam nung Hindustan Paper Corporation (HPC) Limited indang paper mill ana shibangtsü tetuyuba agütsüogo ta Centre-i nenshia metetdaktsü.
Paper mill anaji Nagaon aser Cachar nung lir aser tesüiba küm aika mapa meinyaki arur.
Assam Congress MP aser Assam Pradesh Congress Committee president Ripun Bora-i asüngdangba ka langzüdang “HPC Chairman aser Managing Director-i NCLT nung ken o ka benok saka ibaji appellate tribunal-i magizük” ta Union Minister for Heavy Industries and Public Enterprises Arvind Ganpat Sawant-i ashi.
Assam nungi Union minister for State Rameswar Teli-i anir BJP MP teshimtet telok kati Sawant den ajurutepdang “Centre sorkari paper mill ana lapoktsü merangtsü” ta pai nangzüka liasü.
Barak Valley nung industry tulutibaji Cachar Paper Mill ya lir. Iba mill ya Hailakandi district nung amenoka lir.
Külen, Nagaon mill ya Morigaon district nung lir. Cachar paper mill nung October 20, 2015 nungi aser Nagaon mill nung March 31, 2017 nungi mapa meinyaki arur.
Mill ana shibangba sülen idakji mapa inyaker nisung 50 dak tema soseta süogo.
Tang tesüsabuba asübaji April 29, 2019 nü arishi küm 55 tain Biswajit Mazumdar sosetba liasü.
Mazumdar ya Nagaon Paper Mill nung mapa inyaker ka liasü aser pa indang official quarter nung pa soseter lia angu.
“Ni asür, iba tebilemtsü ya India sorkari abentsü” ta pai shidi ka zülur toktsüba nung shia liasü.