Trinamool Congress-i Naga yimten tebilemtsü maparen nung yariteptsü

Dimapur, Feb. 20 (TYO): Honibarnü Nagaland nungi Parliamentary Working Committee-i Kolkata nung Trinamool Congress lennir aser taoba Union Railway Minister, Dinesh Trivedi den ajurutepa Naga yimten tebilemtsü onük dang masü saka Nagaland dak sendakba onük aika lemsatep, ta Media Cell, Chief Minister’s Office, Nagaland sangdong ka nung metetdaktsü.
Trinamool tanishir aser West Bengal Chief Minister, Mamata Banerjee election dak sendakba maparen nung kanga mazüngi aliba ajanga Trivedi-i la tenüng nung Nagaland nungi PWC züngsemtem den ajurutepa senden amen.
Parliament nung Naga yimten tebilemtsü onük benoka o lemtepdang pusema nungitba dang masü saka linük nung yimten telok balala dang Naga nunger onük pusema nungittsü atema jembitsü, ta Trinamool lenniri nangzük.
Ni Naga nunger onük atema o jembitsür ka ama inyaktsü akok ta Trivedi-i ashi aser paisa PWC züngsemtem dang yimten tebilemtsü indang dang masü saka rail & road connectivity amala terenlok mapa dak sendakba onüktem asüngdang.
Idangji Nagaland Chief Minister TR Zeliang-i Trivedi dang Southeast Asian linüktem den road & rail connectivity ji Nagaland ajanga Moreh tashi yanglutsüla ta ashi.
UPA II sorkar mapang Trivedi-i Union Minister for Railways inyak aser idangji pai Nagaland semdanga Dimapur aser Guwahati tsüngda senzüba Nagaland Express tenzükja liasü.
Tanü Nagaland nungi PWC den amenba senden nung Trivedi den Trinamool Congress lennirtem kar aden aser senden tembangba sülen pai parnok Bengal Club-i anir ao aser idakji parnok sensaksem mapang liasü.
Rajya Sabha nung Trinamool Congress nungi MP 12 lir.