Trinity School, Kohima 7buba Annual Sports Week liogo

Kohima, April 1 (TYO) : March 28 nungi 30, 2017 tashi New Reserve Police Ground aser School moapu na nung Trinity School, Kohima, 7buba Annual Sports Week 2017 liogo.
Iba asayamung nung New Reserve Panchayat nung mendenbuba aser State Dairy Farm manager, Dr. Asalie Khezhie tongti tesemdanger aser New Reserve Youth Organization nung Tir, Keneilhoulie Sokrano tetushi tejaoker süa sentong lapoktsü.
Dr.Khezhie-i, temang nung tashi ita alitsüji kanga nüngdak. Temang yakyaka aser tashi ita melira saisapong aser shisatü bushiba nung tetsükdak alutsü. Temang nung tashi maitba ajanga asen nükjidong metongtettsü, ta kaketshirtem ajungshi.
Kaketshir ka taküm nung saisapong nüngdakba indang lemsatepba mapang pai, nisung shia dak sempet balala lir aser iba sempetji asen tashi mesüka lir, ta ashi.
Anogo asemnü asayaba asayamung nung football, volleyball, athletics, carom, badminton, table tennis, dodge ball, 3 legged race, ball passing, cock fight aser futsal asayatem asayaa liasü.
March past tetoktepba nung Japfü House (Blue)-i takok angu aser parnok sülen Dzükou House (Yellow) jenjang nung takok angu. House ana sülen Patkai House (Green), Japfii aser Saramati House (Red)-i tem liasü.