TRIOS’ Home For Music nung Khristmas jeli sentong amung

Dimapur, December 10 (TYO) : Trios’ Home for Music nung music student tem den tsüraburtem, tesayurtem aser tetushi tejaokertem dena December 9, 2016 nü Lotha Baptist Church Diphupar nung Khristmas jeli sentong mungogo, ta sangdong ka ajanga metetdaktsü.
Iba sentong nung piano, violin aser guitar atemertem den kentenertemi parnok sempet sayua Khristmas ken balala ajanga shilem agi.
Tesüiba mapang State Chaplain Rev.Yankey Patton-i pa sentong nung adenba dang masü saka flute agi temeja ken ka atenba ajanga sentong tali tobur jungdaktsü aser tanurtem nem temoatsü meshia sarasademtsü.
Pankathung Ovung aser Nchumbemo Patton natia trumpet agi nisung anati atenba ken ka aten.
Tesüiba mapang Naga Idol nung finalist aser music school nung vocal tesayur Thunglamo-i, tsüraburtemi onok dak tamang kateta aser temulung lema parnok chirtem onok dang nungi angazüktsü atema music school-i yokba atema pelar, ta ashi.
Pai, nenoki nenok tanurtem atema maneni sarasadem nung nungitba ajanga parnok dak aliba miim sempet tali temai adoka amshitettsü, ta shisem.
Trios’ Home for music ya lapoker küm anabuba ajunger aser iba school ya 4th mile, Dimapur nung amenoka lir. School nung tang tanur ajak agi parnok 75 lir aser sangküm nungibo children choir ka tentettsü sentong lir.