Triple talaq ozüng ya Muslim tsürtem anema lir: Owaisi

Hyderabad, Rongjui/September 19 (Agencies): Tanü All India Majlis-e-Ittehadul Muslimeen (AIMIM) Tir, Asaduddin Owaisi-i, triple talaq ya Muslim tsürtem anema lir, aser linük temzüng den mapet, ta aitsüogo.
Hyderabad nungi MP, Owaisi-i, “Iba ozüng ya linük temzüng den mapet. Iba ozüng ya linük temzüng kübok ‘right to equality’ anema lir, kechiyong iba ozüng ya Muslim nunger atema dang lir. All India Muslim Personal Law Board aser tetsür tentettemi iba ozüng anema Supreme Court nung ken o benoktsüla,” ta ashi.
Tanep Centre sorkari ozüng ka agizüka triple talaq ya temzüng alema lir ta telemtetba agia agizük.
“Iba ozüng ya Muslim tsürtem anema lir,” ta pai ashi.
“Iba ozüng ya ajanga Muslim tsürtemi ochi temeden mangutsü. Islam yimsü nung kiyimba ya civil contract ka lir, anungji iba anema ozüng benokbaji tim masü,” ta paisa ashi.
Tanep Union Law Minister, Ravi Shankar Prasad-i, “Tanü Cabinet-i Triple Talaq atema ozüng ka agizükogo. Iba ozüng tongtiji, takoksa angur kinüngtsü mesüra lar sosemdangsem kari FIR benokra ibaji agizüktsü,” ta metetdakja liasü.
“Tanabuba nung ibaji lenla ajak nungi asutsüla, kinüngtsüi benokba aser magistrate-i agizükba nung ajemdaker ibaji agizüktsü. Tasembuba nung, kuli kar nung ajemdaker magistrate-i bail agutsütsü akok, ajisüaka kinüngtsü ken o angadangba sülen ang inyaktsü akok,” ta Prasad-i ashi.
”Ano tang ozüngtemji, tetsürla/takoksa angur kinüngtsü jagi tanurtemji agitsü, aser la den tanurtem atema senotsü agutsütsü asoshi magistrate-i latettsütsü,” ta Law Minister-isa ashi.
Muslim nungertemi khenyongi balalulatsü atema Triple talaq inyakyim benshir.
2017 küm Supreme Court-ia, triple talaq ya temzüng alema lir ta obendang agutsüogo.