Tripur nung tesayurtem mapa kümzüka ayutsüba atema inyakdar

Agartala, Aenjeti 10 (Agencies): Ministry of Human Resource Development (MHRD) puri Sangtennü Tripura nung tesayur parnok 10,323 Supreme Court-i tetuyuba agütsüba sülen December 31 nungi mapa nung anendaktsütsü aliba dak sendakba nung Right to Education Act (RTE) 2009 amend asütsüba atema tanga lenmang ka sayua Law Ministry dangi file ka yokogo.
Tripura nung BJP pur election in-charge Dr Himanta Biswa Sarma-i osangbenertem dang ashiba agi, taoba hopta BJP nungi teshimtetba pur rongnung Assam nungi MP ana, Tripura BJP MLA Sudip Roy Barman aser tesayurtem rongnungi züngsem kar, HRD minister Prakash Javadekar den ajurutepa parnok mapa kümzüka ayutsüba atema khangogo.
Himanta-i ashiba agi, “MHRD puri RTE Act amend asütsüba atema law ministry dangi file ka yokogo, aser iba nung parnoki Tripura nung ken o adoka aliba dak rangloker linük nung khen atema Act nung agüja aliba academic aser professional degree tem agintsü asoshi benokdanga lir, aser iba ya agizüktet nungbo tesayurtem kasa tebilemtsü agi tonga alirtemnema teyari agütsütsü.”
Ajisüaka paisa ashiba agi, Tripura nung left front sorkari jenjang ana nung aibelena lir. Mezüngbubaji sorkari RTE Act nung manidaki tesayurtem nem mapa agütsü aser temzüngdak mapetba ochimeshi yimya nung maparentem inyaka lir.
Tanabuba nung 2014 küm high court-i item mapatem agintsü aser iba atema ita trok latettsü, saka parnoki item mapatem kümzüka ayutsü asoshi lenmangtem masadangi Supreme Court nung iba ken o benok.