Tripura Angh-i lanurtem dang West aser South India nung mapa bushitsü ayongzük

Agartala, March 23 (Agencies): State nung mapa mangu aliba lanurtemi India linük ajunga nung, talisa West aser South India nung mapa bushitsü asoshi Tripura Angh, Tathagata Roy-i ajungshi.
“Tripura indang alinük ya kanga tezülen aliba ajanga nija aser lokdi balalai industry bener maruteter. Industry maliba state ka nung lanur ajunga nem sorkari mapa agütsütsü tasak lir,” ta Roy-i ashi.
“India anüdoklen mapa angutsü kanga tasak aser nükla kangabu mangur, anungji lanurtemi India anülulen aser South len mapa bushitsüla. Iba den külemi lanurtemi mapa inyak ashitsüla,” ta Angh-isa ashi.
Linük nung yimten yimsüsüba aser rongsenkettsüng melenshia aoba asoshi asüngdangba mapang, “Ni Angh ka asünung iba onük nung ni kecha meshitettsü,” ta Roy-i langzü.
“State sorkar den ni tesendaktep kanga junga lir. Mapa kar nung ken o mangatettep ajurur, saka Constitution nung aliba ama angatetteper,” ta pai ashi.
State sorkar inyakyim asoshi asüngdangba mapang, “Nüburtemi shimteta aliba MLA tem mapa aser inyakyim nung ni kecha ashitsü makok,” ta Angh-i langzü.
“Gandacherra aser Jampui dak alaka state nung district headquarter aser tesem ajunga nung ni semdangogo. Tripura state ya kanga tobur tajung lir,” ta paisa ashi.