Tripura aser Nagaland nung BJP-i sorkar akümtsü

Imphal, Tsüklai 5 (Agencies): Tripura aser Nagaland nung BJP-i sorkar akümtsü aser Meghalaya nunga Manipur nung atalokba ama ajurutsü imlar, ta Manipur chief minister Nongthombam Biren Singh-i ashi.
“Tripura nung onoki Left Front madak takok angutsü aser onok den yaritepba telok Indigenous People’s Front of Tripura (IPFT) den külemi sorkar akümtsü. Tripura nung alirtemi temelenshi aginür” ta Biren Singh-i ashi.
BJP General Secretary, Ram Madhav aser Northeast Democratic Alliance (NEDA) convenor, Himanta Biswa Sarma nati mapa meranga inyakba ajanga Tripura nung BJP-i takok tulu angutsü ta paisa shisem.
Nagaland nunga tawa tasen tentetba National Democratic People’s Party (NDPP)-i pusema BJP-i sorkar akümtsü, ta Manipur chief minister-isa metetdaktsü.
NDPP ya taoba Nagaland CM aser tang teinyakdak Lok Sabha MP Neiphiu Rio lenisüba kübok lir.
Taoba Küptoknü BJP nung Nagaland atema election in-charge aser Union Minister of State for Home, Kiren Rijiju-i BJP aser NDPP na tesentaktep yangluba aser 20-40 menden lemsatsü lemtetba indang osang metetdakja liasü.
Nagaland nung tongti party temi election magidang Naga yimten latettsü takhangba agütsüba asoshi telemtetba ka agitsü imlar, ta Biren Singh-isa ashi.
Ajisüaka, pai Meghalaya asoshi shisabulua bilemba olen ka ashiba agi, “Meghalaya nung BJP-i election agiba sülen National People’s Party (NPP) den tesentaktep yanglutsü maongka ka angutsü ama bilemer. Yaküm Manipur assembly election nung yamaji atalok aser tang Meghalaya nung ibaji ataloktsü akok.”
Assembly election agitsü aliba state asemprongla nung terenlok aser temelenshi indang jembir aser iba atema Biren-i ashiba agi, “northeast nung terenlok ya kanga menur ang atong aser iba mapaji tang ang tenzük.”
“Terenlok mapa inyakdar saka asenoki ano tangar memenep. Manipur litsü ajanga terenlok mapa sadema meinyakteter aser iba onük asoshi Assam nung tajungba inyakdar” ta paisa shisem.
Tripura nung Tsüklai 18 nü aser Nagaland o Meghalaya nung Tsüklai 27 nü assembly election agitsü. State asemprong nung Metsüremi 3, 2018 nü votes azüngtsü.