Tripura: Bank ketdangsertem indang gari bo ngutetogo

Agartala, November 27 (Agencies): Tripura Gramin Bank nung inyaker ketdangser parnok pongu mejangjaba nisungtemi pur aoba tang tashi kong aliar mejangjateter. Parnok indang gari aser motorcycle bo ngutetogo saka parnok kong ailar kecha osang mali, ta police sangdong ka ajanga metetdaktsü.
Superintendent of Police Bijoy Debbarma-i ashiba agi, Tripura State Rifles aser tanga security forces temi ketdangser parnok pongu ya maneni Khowai aser Gomati districts nung bushidar.
Director General of Police Akhil Kumar Shukla aser tanga tongtibang ketdangsertemi iba bushisüngdang ya aachayangdar.
Police ketdangser kati ashiba agi, Bank nung ketdangsertem indang gari aser motorcycle ya, ka Dhalai district kübok Ambassa tesem nung, aser ka Khowai district kübok Teliamure tesem nung, ta ngutetogo.
Maneni police temi Border Security Force dang arrtsü len meita aoba maparen tali asentenshir inyaktsü asoshi metetdaktsüogo, aji asünungda nisung apurtemi item ketdangsertem arrtsü ajanga Bangladesh-i bener motettsü.
Taidu Branch Manager Tanumoy Bhattacharjee, 30, Sujit Chandra Dey, 28, aser Raktim Bhowmik, 31 nunger ya Hokolbar aonung mejangjaba nisungtemi Teliamura ajanga Agartala-i gari nung mener oya alidang pur ao. Subrata Debbarma, 32 pur aoba mapang nung pa motorcycle nung mener arua liasü.
Ketdangsertem kinungertemi ashiba agi, mejangjaba nisung kati parnok dangi call süa bank staff shia atema sen lakh metsütsü khangogo.
Kasa mapang nung iba ken o dak sendakba nung state Bharatiya Janata Party puri item ketdangsertem Mongolbarnü tashi nung mekümzükra parnoki Chief Minister Manik Sarkar’er kima longbanger longkak aittsü, ta amokmeren.