Tripura Chief Minister nem ‘Z’ category security agütsütsü

Agartala, Rongjui (September) 19 (Agencies): Tripura Chief Minister Biplab Kumar Deb ya tang ‘Y’ category security nung züngsema lir saka pa taküm lendong nung aliba osang ka ajanga pa nem ‘Z’ category security cover agütsütsü.
Intelligence osangtem nung ajemdaker Union Ministry of Home Affairs (MHA)-i Tripura state police force dang drug mafia-i Chief Minister Biplab Kumar Deb taküm agitsü tasa atonga lir ta osang metetdaktsü.
Tripura nung taoba Minister aser BJP MLA Ratan Chakraborty-ia Mongulbarnü Agartala nung BJP headquarters nung osangbener den jembidang, “Asia nung drug mafia tongtitem tawa tu Myanmar yimtiba nung adenshi aser Tripura Chief Minister Biplab Kumar Deb taküm agitsü atema telemtetba agiba atema Union Home Ministry-i shisabulur” ta metetdaktsü.
“Parnoki pa tasüba agi merenshitsü sangoktsüogo aser iba jagi Union Home Minister-i rongdak senden ka ayonga amen aser State Home Department nem osang sangoktsü. CM Deb-i Tripura nung drug mafia tem anema mapa tenzükba atema nisung aikati pa taküm agitsü atema merangtsü” ta Chakraborty-isa ashi.
Külen BJP general secretary Pratima Bhowmik-ia drug mafia ajanga Deb taküm agitsü tasa atongba osang jangjashitsü.
“Myanmar nung drug mafia tem adenshi aser Chief Minister-i drug o ganja shibelenba anema mapa inyakba atema pa taküm agitsü lemtetba osangtem onoki angazükogo” ta laisa ashi.
Tang Chief Minister Deb ya Bangalore nung oa lir. NIT, Agartala nung video conference ajanga ISRO-Space Technology Incubation Centre lapoktsü atema pa Bangalore-i ao.
Iba osang angashiba sülen Tripura state police force-i Chief Minister Deb indang security akangshitsü atema sentong ka renemogo.