Tripura CM aser BJP lennirtemi Mizoram nung nübo yimtsür

Agartala/Aizawl, Mongputeni (October) 23 (Agencies): Tripura Chief Minister Biplab Kumar Deb aser tanga state BJP lennirtemi Mizoram nung party atema nübo yimtsütsü ta Mongulbarnü metetdaktsü.
“Tanü Chief Minister Mizoram-i ogo aser Social Welfare Minister Santana Chakma o party MLA Shambhu Lal Chakma den party General Secretary Pratima Bhowmik nungertem oa lir” ta Bharatiya Janata Party (BJP) otongdar Nabendu Bhattacharjee-i ashi.
CM Deb aser tanga party lennirtemi Mizoram nung election nüboyimba sentongtem aser party züngsem sendentem nung o jembitsü, ta paisa ashi.
“Congress-i sorkar yimsü asüba state nung BJP atema tongti nüboyimtsürji Tripura Chief Minister lir, kechiyong pa lenisüba kübok BJP-i Tripura nung küm 25 tashi Left sorkar yimsü süyonga aruba atsüngdok” ta Bhattacharjee-isa metetdaktsü.
Christian tem teimba aliba Mizoram state-i Tripura den Assembly constituency 5 shi kati arrtsüa lir.
Taoba hopta BJP President Amit Shah-i Mizoram nung election nüboyimba sentong tenzüktsü aser idangji Assembly menden 40 prongla nung tokteptsü ta metetdaktsü.
Mizoram nung BJP lenirtemi Congress sorkar atsüngdoktsü atema akokba tashi inyaktsü ta shiyonga arur.
Northeast nung Congress sorkar aliba state ji Mizoram dang lir aser BJP lennirtemi iba state nunga takok ngua Northeast ajunga saffron sentsü kümdaktsünür.