Tripura CM-i special permission agitsüba agintsü asüngdang

Agartala, Monupii (May) 7 (Agencies): Tripura aser Bangladesh na tsüngda shishilembaba ajungkettsü atema Chief Minister Biplab Kumar Deb-i Tripura adena Bangladesh nunger India-i aitsüba atema special permission agitsü nüngdakba ya agintsü asoshi asüngdangogo
Ministry of External Affairs puri New Delhi nung Act East Policy dak sendakba nung senden ayongzüka akadang Deb-i ashiba agi, “Bangladesh nunger mashi ka India sorkar nungi visa tejangja ngutetra land ports mesera international airport mashi ka ajanga India-i aitteter, ajisüaka visa tejangja bener liaka Bangladeshi nungertem Akhaura aser Tripura kübok tanga land port tem nungi India-i aitsüba atema special permission ka agitsü nüngdaker.”
Pai MEA tang iba ken o asadanga temelaba balaka agitsü nüngdakba ya agina Bangladesh nunger visa tejangja bener alirtem Tripura nung land port mashi ka nungi India-i aittsü melatsü asoshi mepishi. Deb-isa Tripura aser Bangladesh tsüngda shishilembaba ajungkettsü asoshi Bangladesh nungeri Port Restriction benoka aliba ya agintsü asoshi mepishi.
“2016 küm Tripura aser Bangladesh na tsüngda sen crore 304. 83 alang shishilembaogo. Ajisüaka tripura nungi oset belener aobabo sen crore 4.60 alang dang liasü, anungji Bangladesh nungeri Tripura nungi oset belener aoba tem nung Port Restrictions benoka aliba ajanga Tripura nunger akoksar,” ta Deb-i ashi.
Deb-i Ministry of External Affairs dang Tripura nungi Bangladesh-i belener aoba oset 27 nung tenokdangba agüja aliba agina shishilembaba ajungkettsü asoshi jenjang tapet agitsü asoshi mepishi. Paisa Chittagong port den tesendaktep yanglua shishilembatsü atema benoktsü asoshi mepishi. Chittagong Port ya Sabroom (South Tripura) nungi Km 75 dang lir.
Iba senden nung paisa BBIN (Bangladesh, Bhutan, India and Nepal) Motor Vehicle Agreement benoktsüba atema keno süoka jembi.
“Tripura sorkari MEA dang Agartala nungi Kolkata-i Dhaka adena aotsüba aser khu abenba garitem Agartala nungi Ashuganj, Belonia nungi Chittagong aser Sabroom nungi Chittagong tashi tetsükdaktsü kecha makai senzütsü asoshi BBIN Motor Vehicle Agreement benoktsü mepeshir,” ta Deb-i ashi.
Chief Minister-isa MEA dang Bangladesh sorkar nungi Dhalai District kübok Kamalpur, aser North Tripura kübok Ragna (Palbasti) nung Haat ana lapoktsüba atema no objection certificate meshitsü asoshi asüngdang.