Tripura CM indang taila Facebook account atema Interpol dangi abentsü

Agartala, January 9 (Agencies) : Tripura Chief Minister Manik Sarkar indang taila Facebook account lapokba atema Tripura Police-i Interpol dang nungi teyari meshitsü akok, ta sorkar ketdangser kati metetdaktsü
“October 2014 nunga Chief Minister Manik Sarkar indang taila Facebook account ka lapokba atema police-i bushisüngdang asü. Taoba hopta tu onok dangi iba kasa osang ka benok aser ibaji onoki Interpol office, California dangi abentsüsa akümtsü” ta Tripura police ketdangseri ashi.
“Iba dak sendakba nung state law department-i Cabinet dangi abentsü aser cabinet-i agizükba sülen union home ministry dangi abentsü aser parnoki Interpol dangi abentsü” ta paisa shisem.
“Chief minister indang Facebook account ka lapoktsü merangba tesüsaba inyakyimji taoba hopta liasü. Pa indang taila account temji bendang linüktem nungi amshi” ta ketdangserisa metetdaktsü.
Ano külen, Director General of Police K. Nagraj-i ashiba agi, “Tripura Police-i cyber crime ka atema telok balaka tenzüktsü atema mapa inyaker. Kobi melii cyber crime dak sendakba ken o tem onoki takok ngua bushisüngdangtettsü imlar.”
Osangbenertemi chief minister Manik Sarkar dang asüngdangdang, pa indang mail ID mesüra Facebook account kecha mali aser nisung shinga nema mail ID mesüra Facebook account lapoktsü temelaba agüja mali ta langzü.