Tripura CM onük mesayuba kuli bushisüngdangtsü CPM-i akhanger

Agartala (Tripura), August 18 (Agencies): August 15, 2017 nü Independanece Day anogomung sentong nung Tripura Chief Minister, Manik Sarkar-i jembiba onük Prasar Bharati-i mesayuba nungji yimtenren sentong tamajung lir, ta aija CPM politburo aser state party committee-i ibaji bushisüngdangtsü takhangba agütsüogo.
Party-isa state tesem ajaklen Prasar Bharati aser Centre nung BJP-i aniba sorka ranema longkak aittsü ayongzükogo.
Sangdong ka ajanga state information directorate-i, Prasar Bharati-i Centre sorkar mapa tamajungtem miimbangtsütsü meranger, ta aitsü.
Chief Minister-i jembiba onük pusema state information directorate-i, Chief Minister-i sensotem dang yimtenren nung tatalokbatem atema tekümdangtsü ashiba nungji kecha tai mali, ta ashi.
Ano külen yimti nung Prasar Bharati office tongti, UK Sahoo-ibo, August 15 nü CM-i jembiba onükji minute 12 yokogo, aser tasüngnüa yokogo, ta ashi.
Paisa, “Regional bulletin nung chief minister-i jembiba onük dang masü saka district balala nung Independence Day sentongtem yokogo. Independence Day Tripura CM-i jembiba onük mesayu ta tai tongloktsübaji shidak masü,” ta ashi.
Prasar Bharati ketdangsertemi, “Mangatettep madoktsü atema CM dang pa onük yanglushitsü mepishia liasü, saka pai yamaji meinyak. Ajisüaka pa onük mesayu ta masü. Pai jembiba onükji tesem ajaklen sayuogo,” ta metetdaktsü.