Tripura CPI(M) pur 4 yiru: RD minister trea agi jenbu

Agartala, August 31 (Agencies): Tripura, Rural Development Minister, Naresh Jamatia den külemi CPI(M) nung lenir asem yashi nikongtsütsü, Indigenous People’s Front of Tripura (IPFT) pusemertemi amakba nungi jenbuogo.
Police osang ajanga ashiba agi, CPI(M) nung inyaker parnok pezü tashi iba lendong nung kanga mejungi yirua Agartala Govt Medical College-i anirogo. Ajisüaka doctor temi parnok lendong nungi jenbua lir ta shiogo.
Minister Jamatia-i ashiba agi, CPI(M) puri Centre nung BJP-i aniba sorkar dang onük trok dak ajemdajer takhangba agüja arudar aser iba dak sendakba nung rally ka ayongzüka nikongtsütsü kaa aliba mapang nung ajungbena mejangjaba nisungtemi long agi aon tenzük aser rally nung adenertem amak.
“Tripura State Rifles sepaitem aser tanga paramilitary forces temi ni iba tesem anasa aliba security camp-i anir ao saka local lenirtem parnok pezü tashi yiruogo aser iba rally nung dena aliba nüburtem ground nungi jena otet,” ta Jamatia-i ashi.
Paisa ashiba agi, police temi iba ya atalokli item nisungtem aputsü atema iba ground temeket nung bushisüngdanga ao saka shinga mepushi.
“Item nisungtem ya IPFT pusemertem ta bilemer, kechiyong parnoki iba amala maparen ya taoba mapang nunga inyaka lir. Iba ya ano BJP puri CPI(M) pur anema inyakba maparen ka,” ta Jamatia-i ashiba den külemi paisa ano par party puri item amala maparen anema sentong amenoker agitsü.
CPI(M) state Secretary Bijan Dhar-i iba tatalokba aitsüba den külemi pai ashiba agi, “Iba amala IPFT pur inyakyim ya joko maremzüktsü. Party puri sorkar dang iba mepetmesü adokdaktsüba nung sendak aliba ozüng raksartem anema jenjang tapet agitsü asoshi mepishiogo.”