Tripura Governor anema Tir Kovind dangi shidi zülu

Kolkata, Metsüremi (March) 10 (Agencies): West Bengal nung shisashir kari India Tir Ram Nath Kovind dang Tripura Governor Tathagata Roy anema mapa inyaktsüa takhangba agütsü.
Tathagata Roy-i social media ajanga ozüng alema mapa inyakba pusemba aser ajungmesoba atema merenshiang ta parnoki akhanger.
Agartala nung Lenin indang kürakyanglu ka raksatsüba mapang Roy-i iba mapa inyakertem pusema nungitba sayua “Democratic inyakyim ajanga akümba sorkar kati yanglubaji, democratic inyakyim ajanga akümba sorkar kati raksatsütettsü” ta zülu.
“Linük Temzüng amer Governor shingaia Roy-i Metsüremi (March) 6 & 7 anogotem Twitter nung ashiba ama mashitsü. Roy-i iba olen jembiba ajanga linük nung tensa mejungi kümdaktsüogo. Iba ya nai (Tir) süoki ia agitsüla. Linük temzüng indang mapa inyaktsü melena, tia maka Roy-i ozüng alema mapa inyakertem pusemer aser ajungmesor. Anungji, pa ozüng tesashi agi merenshitsü akhanger” ta shisashirtemi Tir dangi shidi ka zülu.
Iba shidi nung sign asürtem rongnung Sahitya Academy Award angur Shirshendu Mukhopadhyay, novelist Nabaneeta Dev Sen, taoba Trinamool Congress MP Kabir Suman aser Indologist Nrisingha Prasad Bhaduri nunger dena lir.