Tripura High Court-i private tuition noktanger

 

Agartala, September 4 (Agencies) : Tripura nung sorkar school aser sorkari teyari agüja lapokba school tem nung tesayurtemi private tuition magitsüla ta Tripura High Court-i tetuyuba ka agütsüogo saka iba anema kaketshir tsüraburtem kari ola adoker, ta Hokolbarnü sorkar ketdangser kati ashi.

Chief Justice Deepak Gupta aser Justice Utpalendu Bikash Saha na züngsemba division bench-i Brihostibarnü iba tetuyuba ya agütsü aser parnokisa nija school tesayurtemi pei school kaketshir nem private tuitions magitsü tetuyuba agütsüogo.

Ajisüaka, nija school nung tesayurtemi tanga school kaketshirtembo tution agitsü akok, ta Tripura High Court-isa tetuyuba agütsüba nung shia lir.

Iba tetuyuba ya kaketshirtem tsürabur karibo magizüker aser ola adoker.

“Taküm May ita high court-i government, non-government, semi-government aser private school tesayurtemi tuition talitabong agiba indang ken o ka agizük. Iba onük ya court-i mapang talangka angadanga aru aser ano state sorkar nungia tebilembatem meshiba sülen private tuition magitsü tenokdangba agütsü” ta Tripura school education department ketdangser kati ashi.

2011 küm state sorkari government school tesayurtemi private tuition magitsü tenokdangba agütsüogo, ta School & Higher Education Minister, Tapan Chakraborty-ia metetdaktsü.

“Ajisüaka, tesayur aikati sorkar tetuyuba sülen manidaker. Iba denji kaketshirtem tsürabur kari sorkar school tesayurtem dang private tuitions agitsü nenshi. State sorkari High Court telemtetba pusema nungiter” ta minister-i osangbenertem dang ashi.

Taküm May ita High Court-i iba ken o agizükba sülen state school education department-i school tesayur noklang aika nem private tuition agiba atema show cause notice agütsüogo.

Ano, secondary aser higher secondary nung azüngertem aser tsüraburtemi lokti senden aser lungkak aitba sentongtem ayongzüka agiogo. Parnokisa iba onük angatetteptsü atema education department ketdangsertem den ajurutep.

“Private tuition menokdangtsüla. Linük nung aliba education system ya private tuition dak metaloka lir. Kodaser iba ya Tripura nung nokdangtsü” ta tawa tasen tentetba guardian forum convener, Mritunjoy Deb-i osangbenertem dang ashi.

“Secondary aser higher secondary nung azüngertem entrance tests balala nung tetoktepba ajurur. Parnok extra coaching magira, item tetoktepba tatidang nung takok mangutsü” ta Deb-isa shisem.