Tripura-i 1971 Liberation War nüngtem nung park ka yanglu

Agartala, December 8 (Agencies): Küm ti tashi inyakba aruba sülen Tripura sorkari 1971 Liberation War nung taküm bendanga agütsüba India nunger sepaitem aser Bangladesh nüjiso atema rarartem tushia nüngshilung aser park ka yangluogo.
“Nüngshilung aser park ji Chottakhola nung ali tasazük hectares 20.20 nung yanglu. Iba yangluba nung sen crore 7 endok,” ta Tripura Revenue & Health Minister, Badal Chaudhury-i osangbener dang ashi.
Iba tesemji India-Bangladesh arrtsü nungi kilometer 4 shi dang pilar lir.
December 16, 2017 nü Tripura Chief Minister Manik Sarkar-i India aser Bangladesh nunger adenshia lia nüngshilung aser park sayatsü. Iba anogo ya “Vijay Diwas” (Victory Day) ta ser amunger.
Taoba Bangladesh Foreign Minister, Dipu Moni-i November 11, 2010 nü “Bharat-Bangla Maitri Uddan” (India-Bangladesh Friendship Park) yanglutsü asoshi lung azünga yutsü.
“December 16, 2009 nü mezüngbuba Vijay Diwas amungdang onoki iba nüngshilung yanglutsü sentong atong. Iba sülen Manik Sarkar-i March 2010 nung Dhaka semdangba mapang Bangladesh Prime Minister Sheikh Hasina den iba tebilemba lemsatep aser mapa küma inyaktsü tenzük” ta Communist lennir tejen aser MLA legislator Sudhan Das-i osangbener dang ashi.
“Iba tesem ya Tripura sorkar kübok department 10 den Forest Department-i ketdangsüa inyak. Park nung mitsa ka lir aser iba nungi Bangladesh kübok Comilla, Feni aser Noakhali district tem angutsü” ta Das-isa shisem.
“Pranab Mukherjee-i Defence Minister inyakdang 2005 küm ni pa den ajurutep aser iba nüngshilung yanglutsü atema Tripura sorkar nem sem lemzükjang ta asüba shidi ka agütsü, saka pai iba sentong atema ashishitep” ta Revenue Minister Chaudhury-i ashi.
“India sorkari 2nd British Division indang sepaitem nem tetushi agüja Kohima (Nagaland) nung war cemetery ka yanglua lir süra kechiba Chottakhola nung India sorkari kasa nüngshilung meyanglu” ta paisa asüngdang.
Sen crore 12 endokba yanglutsü project ji Centre dangi aben saka parnok nungi telangzüba mangu, ta Das-isa shisem.
Tripura aser Bangladesh nungi teka mapa inyaker mongintemi kürakyanglutem nungi noksatem yanglua lir.
Park nungsa museum ka lapoka lir aser iba nung Liberation War mapang amshiba prangpong-injangtem, noksatem aser kakettem lir.
Park nungsa taoba India Prime Minister Indira Gandhi aser Bangladesh tenzüker Sheikh Mujibur Rahman na indang kürakyanglutem yanglua lir.