Tripura-i Bangladesh dang ali meshir

Agartala, August 7 (Agencies): Tripura sorkari Bangladesh sorkar dang Maharaja Bir Bikram (MBB) Airport tera ulushitsü atema ali meshiogo ta Chief Minister Biplab Kumar Deb-i ashi.
“Tripura nung aliba airport ya arrtsü nung dang lir aser iba jagi Bangladesh nungertemia tajangzük angur” ta Deb-i ashi.
“Ajisüaka, tayimtsü tulu anentsü atema runway ulushitsüla. Iba atema ni Bangladesh dang alli meshitsü atema Centre dang shiogo” ta paisa metetdaktsü.
Bangladesh-i ali agüja airport ulushira, ibaji linük anaprong atema tajangzük asütsü ta Deb-isa shisem.
“Küm shia Bangladeshi nunger aikati Tripura semdanger aser Agartala ajanga India kübok tanga state temi aoer. Onoki MBB Airport nung runway talangba kümdaktsüra, parnokia tajangzük angutsü” ta Tripura Chief minister-isa ashi.
“Onoki ali tilaka, kilometre ka majung meshiogo” ta paisa ashi.
MBB airport tajungba kümdaktsütsü atema Airports Authority of India (AAI)-i Rs 438 crore project ka agizüka lir.
Iba mapatong tembangba sülen Agartala aser Dhaka den ano Chittagong aser Sylhet ama Bangladesh yimtitem den tayimtsü senzütsü akok.