Tripura-i ‘Krishi Karman Award’ agizüktsü

Agartala, April 19 (Agencies): Union Ministry of Agriculture & Farmers Welfare-i 2015-16 küm atema ‘Krishi Karman Award’ Tripura nem agütsütsü asoshi shimtetogo.
Tripura-i iba national award kümnabuba agizüker asütsü. 2009-10 financial year nung Tripura-i iba sempet agizüka liasü. Northeast state tem rongnungi iba sempet agizükerji Tripura ya mezüngbuba asütsü. “2015-16 küm atema Krishi Karman Award asoshi Tripura shimtetba osang Union ministry nungi angazükogo,” ta Tripura Agriculture Minister, Aghore Debbarma-i ashi.
Chiyongtsü adokdaktsübaren nung chiyongtsü ton million 10 dak nungi tali adokdaktsüba rongnungi Tamil Nadu, chiyongtsü ton million 1 nungi 10 tashi adokdaktsür rongnungi Himachal Pradesh aser chiyongtsü ton million 1 majung adokdaktsür rongnungi Tripura ta shimtetba, Ministry nungi aruba shidi nung aliba osang, Tripura Agriculture Department nung ketdangser kati metetdaktsü.
Ketdangsertem ajanga ashiba agi, 2016 küm Tripura-i chiyongtsü ton 825,000 adokdaktsüa liasü aser taruba kümtem nungbo item chiyongtsütem rizünga ayutsü atema sentong yangludar.
“Tripura state anguba mapang (1972) tashi nung Tripura-i chiyongtsü ali hectare shia sert 973 adokdakja liasü aser 2016 tashinungbo ali hectare shia chiyongtsü sert 2,946 adokdaktsüdar,” ta ketdangser-isa ashi.
Delhi nung sentong ka ayonga akadang sempet angurtem ajak nem takok marok den külemi sen crore pongungu agütsütsü.
Tripura den külemi Meghalaya-a Krishi Karman Award kübok senpet sen crore 1 agizüktsü.