Tripura: Kibong 10300 relief camp nung lir, ka süogo, ka samara mangu

Agartala, August 13 (Agencies): Ayongtem nung tzümetsünga atua aliba ajema akümba sülen Tripura nung tzümetsüng tensa tajungba kümdar saka khen atema relief camp lapoka aliba nung ki makartem tali renlokdar.
State Emergency Operation Centre nungi osang ajanga ashiba agi, Tang tashi nung relief camps 68 Tripura nung amenoker mapa inyakdar kong kibong 10,302 jenoka lir. Parnok rongnungi kibong 9274 bo Sadar sub-division kicha nungi lir. Agartala yimti aser iba meketa aliba tesemtem tzümetsüng agi tamajungtiba kongshiogo.
Chief Minister Manik Sarkar-i Howrah ayong len tzümetsüng agi kongshia aliba tesem tem Revenue Minister Badal Choudhury aser tanga tongtibang ketdangsertem den külemi semdangogo.
Civil secretariat nung senden ka akadang relief camp tem nung 24×7 security, power agütsütsüba aser sorochioker aliba chiyongtsü, tanur chiyongtsü aser mozü amala agütsütsü asoshi lemtet.
Committee ajanga tzümetsüng lendong nung mejenbuteti alirtem kümzüktsüba aser bushitsü asoshi tali asentenshir inyaktsü lemtetba den külemi maneni relief camp tem lapoka ali tashibo 24×7 security, power agütsütsü aser sorochioker aliba chiyongtsü, tanur chiyongtsü aser mozü amala medangi agütsütsü asoshi parnoki achaayangtsü.
Director General Police AK Shukla, Principal Secretary for Revenue Sushil Kumar, Principal Secretary for Finance M. Nagaraju, Health Secretary Samarjit Bhowmik, District Magistrate and Superintendent of Police, West Tripura district, Agartala CEO Municipal Corporation and Chief Engineer for Drinking Water aser Sanitation (DWS) nungertem iba committee nung densema lir.
Tzümetsünga aliba tajemba kümaka ketdangsertemi relief camp tem tali ang lapokogo.
Kasa mapang nung Meteorological Department ajanga North Tripura, Unakoti, Dhalai, Khowai aser West Tripura district tem nung tzünglu kanga sashia arutsüba osang agütsüogo.
Iba tensa nung maneni relief camp tem nung yimra, tzü ajanga adokdaktsüba tashidak balala, ramen aser tanga tashidak balala adoktsü asoshi kecha meteta mali anungji Chief Minister-i Health Department dang item camp temi medical team timba yoktsü asoshi tetuyuba agütsüogo. Med team pezü yashisa yokogo. Iba teloktem nung doctor ka den pharmacis ka aser tanga staff tem densema lir.
Camp nung alirtem kar dang shirangra mesera temang tipmedemi kümra emergency operation centre dangi 1070 nung mesera district control room dangi 1077 nung call süa jembitettsü.
Kasa mapang nung Agartala yimti tezülen Noagaon tesem nung rong ka yanglua mener tzümetsünga aliba tesem nung senzüba mapang Tushar Karmakar electrici current agi puseta süogo.
Karmakar ya Noagaon Krishnanagar High School nung class 9 nung azünger. Pa tzümetsünga aliba tesem nungi jena aotsü merangba mapang nung pai ama aliba rong aniba au tai kajagi electric wire nung kongshia tia maka pa idakji current agi puseta asü. Iba sülen pa GB Hospital-i anri ao saka medical officers-i pa tasü bener aru ta sangdong.
Ano maneni arishi küm teko tanur ka yashi nungi samara monguteti bushidar. Tekümzükertemi iba tanur ya kanga meranga bushidar. Ajisüaka tanur sanger kinungertemi tanurji kong aliar mejangjai mangmangtepdar.