Tripura lisopur kaketshirtemi Delhi nung lungkak ait

New Delhi, September 4 (Agencies): Linük yimtiba aser anameta aliba Dehradun yimti nung aliba Tripura nunger kaketshirtem Honibarnü Jantar Mantar, New Delhi nung adenshia mener lungkak aitba sentong ka agiogo.
Sentongji International Tiprasa Forum-i ‘Justice for Indigenous People of Tripura’ omen nung ajemdaker ayongzük aser lungkak aitertemi CBI nem August 23, 2016 tatalokba bushisüngdang südakjang ta takhangba agütsü.
Iba anogo nung Indigenous People Front of Tripura (IFPT)-i Agartala nung Twipra Land ta ser state balaka tentettsü atema takhangba agüja lungkak aitba sentong ka agidang tangartemi parnok dak tashiyim mapa inyak.
“August 23, 2016 ji tejashi anogo la liasü. Iba anogo ya Tripura nung aliba lisopurtem atema dang masü saka alima tesem balala nung aliba India nunger ajak atema tejashi anogo ka liasü. Iba anogo nung Indigenous People Front of Tripura (IFPT)-i Agartala nung ozüngi melaba ama sentong ka ayongzüka agi saka Bangladesh nungi ozüng alema arurtemi onok dak teka sangshi aser taochi melii onok madak ozüng alema mapa inyak” ta International Tiprasa Forum-i sangdong ka nung metetdaktsü.
“Tanü Tripura nunger kaketshirtem aser mapa balala inyakertem külemi longjemer August 23, 2016 nü Agartala nung atalokba osang metetdaktsür. Iba tatalokba ya linük temzüng anema inyakba ka lir” ta ITF president, Hawmchang Debbarma-i ashi.
August 23 nü Agartala nung rally alidang nisung 25 den tema yiru aser dokantem raksatsüba den gari aika rongdoktsü. Iba lendong atalokba sülen lisopur aika (kaketshirtem aser mapa inyakertem) Tripura yimtiba toktsür ajentsüsa aküm.
“Oagi onok kibongtem tetsübu nung lir. Pei litsü, pei linük nung kodaser parnok tsübua alir’ar onoki metetnür. India nunger ama, onoki sorkar dang azütokshi masü saka yimjung dang aginür ta ayongzüker” ta Tripura Student Forum, Delhi president, Billow Jamatia-ia osangbener dang ashi.
Tripura nungi kaketshirtemi Home Ministry dang par state nung tiyongtsüi ia mapa inyaktsü mepishia metetdaktsüogo.
Union Home Minister Rajnath Singh-i Tripura semdangtsü mesüra CBI-i bushisüngdang ka asütsüla, ta parnoki takhangba agütsü.
“Tawa Agartala nung atalokba lendong ya tetsübutsüka aser lendong keta lir ta International Tiprasa Forum (ITF)-i metetdaktsür. Centre aser state sorkari Bangladesh nungi ozüng alema aruba (illegal Bangladeshi immigrants) onük atema telemtetba takang agia mapa inyaktsü ajungmesor” ta ITF sangdong nung metetdaktsü.