Tripura, Manipur & Meghalaya nung 47 buba Statehood Day amung

Guwahati, January 21 (Agencies): Tanü Tripura, Manipur aser Meghalaya nung 47 buba Statehood Day amunger.
President Ram Nath Kovind aser Prime Minister Narendra Modi nati state asem nung alirtem den Statehood Day salem metetdaktsüogo.
President Ram Nath Kovind-i Twitter ajanga Manipur, Meghalaya aser Tripura nung alirtem den tepela salem metetdaktsü.
Prime Minister Modi-ia Twitter nung Tripura nunger dang “küm ka majungdang, state kanga tejakleni ogo. Tripura-i chichiba tashi angateter aser nübor taginübatem kanga kara ataloka arur” ta ashi.
Modi-isa Manipur nunger dang “state topur tajung moaja lir aser mapa meranga inyakba sensotem lir. Iba state semdangdang temeim anguba ni kodanga mamatsü. Maneni Manipur temaba jenjangi atutsü imlar” ta salem osang lemsatep.
Prime Minister-isa Meghalaya nunger den salem lemsatepdang “Meghalaya nungertemi linük asoshi mapa aika inyaktsüogo aser maneni tejakleni aotsü moatsür” ta metetdaktsü.
Taoba mapang chubatemi yimsüa aliba Tripura aser Manipur limatem October 1949 nung Indian Union den ka küma loktep aser January 21, 1972 nü state balaka ta kümteta liasü.
Meghalaya ya Assam kübok liasü aser North Eastern Region (Re-Organisation) Act, 1971 kübok state balaka razüka ao.
Statehood Day indang sentong nung jembidang Tripura Chief Minister Biplab Kumar Deb-i “Tripura “drug free” state ka kümdaktsütsü aser ochishia ketdangsütsü atema par sorkar indang tongti alizüng lir” ta ashi.
Manipur nunga Chief Minister N. Biren Singh-i Manipur Rifles parade ground nung sentong ka nung o jembidang, state nung ajaklen renloktsü atema nisung ajaki sorkar den yariteptsü mepishir, ta ashi.
Meghalaya nunga ‘Celebrating Meghalaya-India’ omen nung ajemdaker hopta ka piyong benjung amungtsü renema lir.
47 buba Statehood Day aser 70 buba Republic Day nüngtem nung state sorkari sentong balala ayonga agitsü.