Tripura minister Mevar Jamatia-i NRC akhanger

Agartala, Luroi (August) 19 (Agencies): Tripura tribal welfare & forest minister Mevar Kumar Jamatia-i Tripura nung National Register of Citizens (NRC) yanglutsü atema takhangba agütsü.
Agartala nung aliba Pragya Bhavan nung lisopur lanurtem indang workshop ka nung jembidang Jamatia-i “Assam nung NRC yangluba pusemer aser par IPFT party-i tanga northeast state tem ama iba takhangba agütsütsü imlar” ta ashi.
Jamatia ya IPFT nung general secretary inyaker aser paisa “”Assam nung NRC mapa inyaker aser central jenjang nung asen Prime Minister aser BJP tir Amit Shah nati o aika jembia ni angashiogo. Iba ya tang rongdak nüngdakba mapa ka lir ta ni bilemer. Tanga state temia NRC akhanger aser oz party IPFT-i asen state nung NRC mapa inyaktsü takhangba agüja arur” ta metetdaktsü.
IPFT-i taoba mapang Tripura nung lisopurtem maitsü samatsü tensa ka nung lir anungji NRC mapa inyaktsüla ta takhangba agüja liasü.
Taküm February ita Tripura assembly election nung takok anguba sülen BJP-i aniba teloktep sorkar nung Indigenous Peoples Front of Tripura (IPFT) dena lir.
Ajisüaka, Tripura Chief Minister Biplab Kumar Deb-i iba ama takhangba mali ta ashir.
Taoba ita tatemlen Deb-i Nagpur semdangdang Tripura nung public-i NRC yanglutsü takhangba kecha mali aser IPFT-i iba takhangba agütsübaji memetet ta shia liasü.