Tripura NH-8 nung truck 4,500 anendena lir; Petrol litre nung sen 250 kümogo

Agartala, July 03 (Agencies): Tripura state linük den sentaktepba lenmang, National Highway-8 nung tang khu abenba truck 4,500 dak tema anendena lir, kechiyong tzünglu sashia aruba ajanga anentsüh alua gari lenmang kilometer 20 tashi nung lishi aser motzü agi sünga lir.
Anogo aika lenmang mejungi aliba ajanga mozü, totzü aser chiyungtsü agi anünga  state tesem kar nungbo petrol totzü liter ka nung sen 200 nungi 250 tashi agi yokteper.
Honibarnü osangbenertem dang Tripura revenue minister, Badal Chowdhury-i, “Osettsüset agi anüngba ajanga Bangladesh nungi nüngdakba osettem belentsü atema merangdar,” ta metetdaktsü.
Tsüngsang majungba den külemi tzünglu maneni aruba ajanga lenmang meyangluteter aser truck timbaka Assam, Karimganj district nung Assam-Tripura arrtsü nung anendena lir.
Tanü Assam Angh, PB Acharya-i lenmang majungba tesemji semdangba sülen pai,  Assam sorkar dang Centre den yaritepa tekaraba nung yanglutsü atema asüngdangtsü ta ashi.  “Sen agi meperiba indang mesükshitsüla. Iba ama tensa yabo tangsa yanglushitsüla,” ta Angh-isa ashi.
Tripura nung chiyungtsü aser osettsüset nung jenjang kanga atuba mapang ka nung Hokolbarnü Chief Minister, Manik Sarkar-i Public Works Department repsema abensang, Chowdhury densema sorkar ketdangsertem den senden ka ayonga menogo.
“Centre aser Assam sorkari NH-8 yanglutsü atema mapang shitak nung inyak asübo Tripura-i timtem majurula. Lenmang tesentaktep junga maliba, northeast state tem timtem atema Centre-i khuret tali abentsüla,” ta Chowdhury-i ashi.
Food & civil supplies department ketdangser kati ashiba agi, tesüiba hopta aika state nung aliba petrol pump 60 prongla nung totzü temogo.
Tan hopta tetenzüklen Union Road Transport Minister, Nitin Gadkari-i twitter ajanga, pai ketdangsertem dang tekaraba nung NH-8 yanglutsü tuyuogo, ta metetdakja liasü.
Ajisüaka truck anishir ka tenüng agi Santosh Das-i, “Ni teimla mangur. Iba tensa ya kanga majung. Lenir kari langka jembiba kijaji onok taginüba metongtsür,” ta ashi.