Tripura nung adhoc tesayurtemi lungkak ait

Agartala, August 14 (Agencies): Supreme Court tetuyuba ka ajanga Tripura nung mapa nungi anentsüba tesayurtemi tanü lungkak aitba sentong ka agiogo.
Iba sentong ya All Tripura Government 10323 Ad-hoc Teachers Association (ATGATA)-i ayongzüka agi.
Tripura nung taoba Left sorkari school tesayur 10,323 tashi ad hoc yimya nung mapa nung shimok saka parnok recruitment rules alema shimba agi mapa nungi anentsü.
Iba telemtetba anema Bodbarnü tesayurtemi Agartala nung lungkak aita jajaba sentong ka ayonga agi.
Parnoki CM Biplab Kumar Deb den ajurutepa onük pungu indang takhangba ka agütsütsü merang saka CMO-i temelaba magütsü.
Parnoki akhangbatem rongnung mapa kümzüka ayutsü, Seventh Pay Commission ama itasen aser allowance agütsütsüba aser mapa regularization atema lir.
Chief minister-i parnok den majurutep tashi parnoki lungkak aitba manentsü ta ATGATA tanishir Bimal Saha-i ashi.
Parnoki High Court nung ken o ka benoktsü ta Saha-isa ashi.
Recruitment policy aibelena shimba süra kechiba tesayurtemi iba atema timtemtsü? ta paisa asüngdang.
2010 nungi 2014 tsüngda Left sorkari tesayur 10323 ji shimba liasü saka iba anema Tripura High Court nung ken o ka benok.
2014 küm Tripura High Court-i obendang agütsüba nung ajemdaker tesayurtem mapa nungi anentsü.
Okadaki tesayurtem March 29, 2017 tashi mapa inyaktsü anogo latettsü aser ibaji December 30, 2017 tashi ta atsülangtsü.
CPI (M) sorkari Supreme Court nung tesayurtem mapa küm ka atsülangtsü atema temepishiba ka benok aser iba nungji ajemdaker SC-i ita trok apuloktsü.
Tripura nung taoba assembly election campaign mapang BJP-i iba khuret koktettsü nangzük aser tesayur shia mapa inyaktsü ta tenangzükba agia liasü.
Tripura nung sorkar kümtetba sülen parnoki Supreme Court nung tesayurtem nem küm ana apuloktsütsü mepishi.
Supreme Court-i tesayurtem indang tebilemtsü repragdanger ita 17 apuloktsü aser ibaji March 30, 2020 tashi lir.
March 30, 2020 tashi dang parnok mapa inyaktsü latettsüba anema tesayurtemi tanü lungkak ait aser regularization atema takhangba agütsü.