Tripura nung BJP aser TMC tsüngda rara adok

Agartala, March 14 (Agencies): Hombar aonung Agartala nung Trinamool Congress (TMC) aser BJP tsüngda rara adokba nung police 11, BJP aser TMC lenir kaka, tanga telok asem nung inyaker kar aser osangbener pezü yiru, ta police osang ajanga ashi.
“TMC aser BJP tsüngda rara adokba anendaktsütsü merangba mapang police tanishir pungu densema parnok 11 yiru,” ta West Tripura nung police tekolakba, Abhijit Saptarshi-i osangbener dang ashi.
State BJP tatong tir, Subal Bhowmik aser TMC lenir, Panna Deb densema telok ana pusemer pungu yiru.
“TMC lenir Sudip Roy Barman teti Sandip Roy Barman-i BJP Mandal tir, Jayanta Dey dak azükba sülen iba rara adok,” ta Saptarshi-i ashi.
Saptarshi aser DIG, Uttam Majumder-i anir police aser Tripura State Rifles (TSR) aika iba rara adokba tesemi ao aser ghonda asem dak tali agia iba rara anendaktsü.
Lokti senshidaktsütsü mechi TSR temi süng agi azükba mapang osangbener pezü yiru.
“Osangbener tejentem telok kati police ketdangsürtem ajuruogo aser osangbener dak azüker TSR tem nem tapet temerenshi agütsütsü asoshi takhangba agütsüogo,” ta Tripura Journalists Union nung tongti zülur, Pranab Sarkar-i ashi.
Iba lendong nung yirur ya anasa aliba mozük-i bener oa anepalutagi.