Tripura nung BJP-i Lok Sabha menden anaprongla akoktsü meranger

Agartala, Rongchii 9 (Agencies): Tawa Tripura assembly election nung takok tajung anguba sülen Bharatiya Janata Party pur 2019 general elections nung state nung Lok Sabha menden ana aliba akoktsü asoshi merangdar.
BJP General Secretary (organisation) aser northeastern states in-charge, Ajay Jamwal-i iba hopta anogo pezü atema Tripura semdangba mapang nung lenirtem den senden ishika kaogo aser züngsemtem dang Lok Sabha election atema renemshi tenzüktsü asoshi shiogo.
State tatong tir Subal Bhowmik-i ashiba agi, “Tripura nungi Lok Sabha menden ana aliba ya akoktsü asoshi onok renemtsü aser inyakyim tali tashi itshitsü atema (National) General Secretary Ram Madhav-i taruba hopta Tripura semdangtsü.”
Tsüklai (February) 18 election nung grassroot level party worker parnok 42,000-i party pur inyakyim nung kanga dang tongtibang shilem ka agiogo.
“Tripura nung polling booths 3,214 lir. Onoki booth level nung inyaker party züngsemtem aser ‘Pristha Pramukhs’ tem party inyakyim atsülangshitsü asoshi meneni asentenshir inyak tenzüktsü,” ta BJP state otongdar Mrinal Kanti Deb-i osangbenertem dang ashi.
1996 küm nungi tenzüka taoba term trok tashi Tripura nung Lok Sabha menden ana ya Communist Party of India-Marxist (CPI-M) puri koka aurogo.
2014 Lok Sabha election nung CPI-M puri vote shilem 64 angu aser BJP-i shilem 5.7 angu. Ajisüaka state nung election nung BJP puri vote shilem 43 aser Indigenous People’s Front of Tripura puri shilem 7.5 ngua Left Front puri vote shilem 45 anguba ajateta sorkar kümtetogo.
State nung party pur jenjang tali junga yanglushitsü mechi nung Deb-i Tentonü Tripura minister tem ajak state party headquarters nung hopta nung ananübo (Tentonü aser Yangtepnü) nüburtem tebilemtsü aser party inyakyim dak sendakba nung tebilemdangba tem angadangtsü asoshi amentsü, ta shiogo.
Taoba ita BJP tir Amit Shah-i, BJP aser parnok den sendaktepa aliba teloki Northeast nung Lok Sabha menden 25 aliba nungi 21 bo sa akoktsü merangtsü, ta shiogo. 2014 küm parnoki menden ti tashi kokteta liasü.