Tripura nung Cancer agi shiranger sensaker nem sen agütsütsü

Agartala, January 11(Agencies): Mongulbarnü Tripura sorkari cancer agi shiranger sensaker nem ita shia sen 600 agütsütsü osang metetdaktsüogo.
“Iba teyari ya cancer patient shirnok küm ka nung sen 150,000 dak nungi teküpokba angur, aser kinungertem rongnung sorkar mapa nung shinga ia mali, parnok nem dang agütsütsü,” ta Tripura Health aser Family Welfare Minister Badal Choudhury-i osangbenertem dang ashi.
Iba sentong ya Social Welfare Department küpok inyaktsü aser shiranger shirnok koda masüba tia nung ali parnok ki tonga oa agütsüdar, ta paisa shisem.
Gautam Majumder Regional Cancer Centre nung tekolakbai ashiba agi, northeast state 8 rongnungi cancer agi shiranger Tripura nung ishiba lir aser Mizoram nung teimba lir.
“Tripura nung Mizoram den medemdangra, lakh ka shia nung cancer agi shiranger 70 lir, koba Mizoram nungbo 200 lir,” ta Majumder-i osangbenertem dang ashi.
Union Health Ministry-i yaküm nungi tenzüka Amrit (Affordable Medicines and Reliable Implants for Treatment) mozü ayokdak India ajunga nung lapoka odar. Cancer aser temolungjang tashidak agi shiranger sensakertem temang anepaluba nung senotsü indokba nung tera ajemdaktsütsü nükjidong nung iba sentong tenzük, ta paisa shisem.
“Amrit mozü ayokdak ya north state ajunga nung kaka amenloktsü. Tripura nung iba mozü ayokdak Brehostibarnü Swami Vivekananda asoba anogo nung lapoktsü,” ta paisa shisem.