Tripura nung Commandant ka den sepai 5 mapa nungi anentsü

Agartala, May 21 (Agencies): Mapa lemzükba nung mangatettep adoka külem sepai ka dak teka sangshiba ken o nung Tripura State Rifles’ 12th Battalion nung sepai 6 tashi mapa nungi anentsüogo.
Parnokji Naib subedar Bipul Ranjan Dey, havildar Kamal Paul, havildar Raju Dhar, (H), naik Maheswar Das aser naik Satyabrata Sinha nungertem lir. May 12 nü rifleman Bhojveer Singh Chauhan dak teka sangshiba atema parnok mapa nungi anentsü.
Iba tatalokba atema Commandant Rati Ranjan Debnath-i mapa kechia meinyak aser iba atema pa-a Hombar nikongtsütsü mapa nungi anentsüogo.
Meghalaya sorkar nung deputy secretary Animesh Das-i sangdong ka nung “All India Service (Discipline and Appeal) Rules, 1969 nung lateta aliba ama Rati Ranjan Debnath, IPS mapa nungi anentsür” ta metetdaktsü.
Iba asoshi TSR 6th Battalion nung commandant Jitendra Debbarma nem 12th Battalion repsema inyaktsü atema mapa lemzüktsüogo ta sorkar sangdong nungsa shia lir.
“Chief minister Biplab Kumar Deb-i DGP aser chief secretary na dang iba onük atema mapa inyaktsü tetuyuba agütsüogo” ta CM atema officer on special duty Sanjay Mishra-ia ashi.
Senior journalist Sudip Datta Bhowmik khasetba dak sendakba nung November 2017 nung Tripura State Rifles’ 2nd Battalion commandant Tapan Debbarma dak tai tonglokja apu.
Sudip Datta Bhowmik ya Debbarma indang personal guard-i khaset aser pa-a pua lir.