Tripura nung CPI(M) lenir ana BJP den aden

Agartala, June 11 (Agencies): Taoba Tripura Assembly Speaker Jitendra Sarkar aser Tripura tribal autonomous district council nung züngsem Joy Kishore Jamatia na Deobarnü tanga lenirtem den külemi BJP nung denogo.
Sarkar shiba taoba election nung Congress nominee ka ama assembly nung shimoka liasü, pa yaküm party aser assembly nungi resign asü.
Jitendra Sarkar ya Schedule Caste lenir ka lir aser pai Assembly election 6ben tashi kokogo. Pa mezüng 2008 küm mangatettep adokba ajanga CPI(M) toktsü aser 2010 küm Congress den aden.
BJP General Secretary Ramlal Ji-i party indang flag party nung tasen züngsemertem nem agüja liasü. Pai ashiba agi CPI(M) aser tanga party tem tashi meite odar aser iba ajanga BJP tashi taitba kümdar. Paisa ashiba agi, parnoki 2018 assembly election akoktsü.
MDC Joy Kishore Jamatia shiba taoba mapang CPI(M) nungi aritoka liasü pai ashiba agi, “CPI(M) puri parnok züngsem karidanga parnok ola adokra parnok tezülen toktsütsü meranger.”
Jamatia-i tribal autonomous district council atema Centre nungi fund arubatem Chief Minister Manik Sarkar-i nokdangba atema pa aitsü. “CPI(M) lenirtemi ni BJP nung adentsü ta osang angazükba sülen nungi parnok den dendaktsütsü asoshi merangya liasü,” ta paisa ashi.
Maneni doctor aser lawyer kar BJP nung denogo. Parnok rongnung Advocate Siraj Ali densema lir. Pa tebu ya Agartala Municipal Corporation nung CPI(M) councilor liasü