Tripura nung doctor tem longkak aitba ajanga nüburtem timtemer

Agartala, January 18 (Agencies): Tripura nung doctor temi tanünübuba longkak aitba ajanga nüburtem kanga timtemtagi. CPM teloki nungi südi, ta temolung melemtetba nisung kari Deobarnü Gandacherra sub-divisional hospital nung inyaker ka dak kanga mejungi azükba ajanga iba longkak ait tenzük.
Aibelenertem aputsü, mozüki nung inyaker asoshi tanüker tajung agütsütsü aser mozüki nung terenlok tajung meshia iba longkak aitba sentong ya Hombar nungi tenzüka sorkar indang mozüki ajak nung agidagi.
“Mozüki nung kü dak kanga mejungi azük aser parnoki ni tepsettsü merenshi. Kechi tai ajanga parnoki ni merenshi, ni memetet. Iba anepdang CPM MLA Lalit Tripura ajanga kü dangi call asü aser shiranger ka anir aotsü asoshi ambulance ka meshi. Ambulance ji yakta yoka liasü saka parnok nungi kecha telangzüba maliasü. Mapang tatsüka lir, ni inyakba mozüki ajanga parnoki ajaba ama melangzü, ta shir kü dak azük,” ta Dr Soumen Sarkar-i ashi.
Soumen dak azüker, Prasanta Kapali (35) aser Krishna Das (40) na police-i bushidar.
Doctor temi ni ajuruogo aser police dang aibelenertem aputsü asoshi tetuyuba agütsüogo, ta Health Minister, Badal Choudhury-i osangbener dang ashi. “Nüburtem asoshi ayuba tesem kecha nunga azütokshi aser ozüng alema mapa inyaktsü asoshi sorkari memelatsü,” ta pai shisem.
Iba lendong ajanga state nung makmakshimak tulu adok aser doctor temi CPM sorkar aitsüdar. Mozüki nung mapa inyaker kümzüka ayutsü atema security kisüng masü saka nüngdak tilatiba-a magütsür, ta doctortemi ashir. Iba küsa ya tesayur nema magütsür, ta Dr Ashok Shina-i ashi.
Tripura Medical College nung internship agirtemia parnok nem Agartala Government Medical College nung inyaker den küsa itasen agütsütsü asoshi takhangba agüja anogo asemnübuba mapa meinyaki lir.